Gjykata e Lartë rrëzon rekursin, Erion Veliaj ngelet në burg
Gjykata e Lartë ka rrëzuar rekursin e Ish-Kryetarit të Bashkisë Tiranë, Erion Veliaj.
Gjykata ka bërë të ditur se nuk ka pranuar rekursin e paraqitur nga personi nën hetim Erion Veliaj, kundër vendimit nr. 130 (87- 025-191), datë 09.06.2025, të Gjykatës së Apelit për Korrupsionin dhe Krimin e Organizuar.
Duke cituar vendimin e Këshillit të Ministrave për shkarkimin e Erion Veliajt, avokatët i kanë kërkuar Gjykatës së Lartë të marrë në konsideratë faktin se në këto kushte ai nuk mund të ndikojë dhe vendosë në rrezik asnjë provë, pasi tani nuk është më Kryetar i Bashkisë Tiranë.
Ish-Kryetari i Bashkisë Tiranë, Erion Veliaj, bëri rekurs në Gjykatën e Lartë masën e arrestit në burg të vendosur ndaj tij nga GJKKO dhe lënë në fuqi nga Apeli i GJKKO.
Përveç Erion Veliajt edhe biznesmeni Elman Abule bëri rekurs në Gjykatën e Lartë për masën “arrest shtëpie” e vendosur ndaj tij me kërkesë të SPAK.
Ndryshe, Erion Veliaj është arrestuar me 10 shkurt të këtij viti ku SPAK ka ngritur ndaj tij akuzat e korrupsionit, pastrimit të parave dhe fshehjes së pasurisë.
Më 10 shtator të këtij viti, SPAK dërgoi në gjyq Erion Veliajn, bashkëshorten e tij Ajola Xoxa, ish-deputeten e PS, Klotilda Bushka, biznesmenët Gentian Sula, Elman Abule, Fatmir Bektashi, Shkëlqim Fusha, Meriman Palushi dhe Sokol Kryeziu, dhe 9 persona të tjerë. Ndaj Veliajt janë ngritur 13 akuza, përfshi ato për korrupsion, pastrim parash dhe deri te mbajtja e sendeve të paligjshme në qeli gjatë paraburgimit.
