Gjykata Evropiane urdhëron autoritetet e Bosnjes: Largoni kishën nga prona e myslimanes!

Gjykata Evropiane e të Drejtave të Njeriut ka urdhëruar autoritetet në Bosnje dhe Hercegovinë që të heqin një kishë ortodokse serbe të ndërtuar në oborrin e një gruaje myslimane, pasi ajo u detyrua të ikte gjatë luftës, në vitet 1992-95.

Vendimi, i shpallur nga Gjykata Evropiane e të Drejtave të Njeriut më 1 tetor, i jep fund një beteje të gjatë ligjore të iniciuar nga Fata Orlloviç dhe 13 anëtarët e familjes së saj, që shpëtuan nga masakra e Srebrenicës në vitin 1995.

Gjykata vendosi që ndërtimi i kishës më 1998 ishte i paligjshëm dhe urdhëroi autoritetet që të siguronin heqjen e saj brenda tre muajve dhe të paguanin dëmshpërblim 5.000 euro për Orlloviçin dhe 2.000 euro për të afërmit e saj.

Fata Orlloviç, 77 vjeçare mirëpriti vendimin e Gjykatës Evropiane e të Drejtave të Njeriut. Ajo tha për RFE se nuk është kundër ndërtimit të një kishe, por kundër atyre që e ndërtuan në pronën e saj.

Orloviç tha se çështja duhet t’u dërgojë një mesazh të gjithëve se ata duhet të vazhdojnë të “luftojnë për atë që është jotja”.

Familja Orlloviç ka luftuar në procese gjyqësore për ta hequr kishën që nga viti 2000, kur u kthyen në fshatin në Bosnjen lindore, rreth 20 kilometra në lindje të Srebrenicës.

Serbët më 1993 dëbuan të gjithë banorët myslimanë të Konjeviç Polje në Srebrenicë, një zonë e sigurisë e Kombeve të Bashkuara, duke vrarë rreth 8.000 burra dhe djem myslimanë, në atë që shihet si masakra më mizorë në Evropë që nga Lufta e Dytë Botërore. Dy gjykata ndërkombëtare e shpallën masakrën si gjenocid.

Situata e kësaj familje nxjerr në pah një nga çështjet e shumta me të cilat përballen qindra mijëra njerëz që ikën nga spastrimi etnik gjatë luftës në Bosnje, por tani po kërkojnë të kthehen në shtëpitë e tyre.