Gjykata Kushtetuese: Parlamenti duhet të zgjedhë Kryetarin për 30 ditë, 1 kandidat votohet 3 herë

Gjykata Kushtetuese e Kosovës  sot shpalli Vendimin duke i hapur rrugë mënyrës së konstituimit të Parlamentit dhe zgjedhjes së Kryetarit, zgjidhje të cilat deputetët e rinjë të Parlmaentit të Kosovës nuk e arritën për 54 seanca.

Fillimisht, në Aktgjykim, Gjykata Kushtetuese tha se kryesuesi i seancës, Avni Dehari, nuk ka vepruar në bazë të aktgjykimit të mëhershëm të kësaj gjykate të 26 qershorit, dhe të gjitha seancat e mbajtura nga 27 qershori deri më 26 korrik i shpalli të pavlefshme.

Duke vazhduar me Pikën 3 të Rendit të Ditës të seancës konstituive, zgjedhjen e Kryetarit dhe Nënkryetarëve të Parlamentit të Kosovës, të ftojë përfaqësuesin e grupit më të madh parlamentar për të propozuar kandidatin për Kryetar me zgjedhe përmes votimit të hapur, votim i cili mund të realizohet vetëm deri në tre herë për kandidatin e njëjtë.

Aktgjykimi, përveç mazhorancës në këto dy çështje aq shumë të komentuara që përçanë edhe shoqërinë kosovare, i ka bërë të qartë edhe deputetëve të opozitës se gjatë procedurës së zgjedhjes së Kryetarit dhe Nënkryetarëve të Parlamentit të Kosovës, duhet të jenë të pranishëm dhe të votojnë.

Dhe, në fund, për të gjithë ata që këtë aventurë politike e kanë parë në pafundësi, Aktgjykimi e bënë të qartë se zgjedhja e Kryetarit dhe Nënkryetarëve të Parlamentit të Kosovës duhet të kryhet brenda 30 ditëve nga dita e hyrjes në fuqi të këtij Aktgjykimi!

Ndryshe, Ndryshe, deri më tani kanë kaluar vetëm dy pika të seancës konstituive: Raporti i Komisionit të përkohshëm për verifikimin e mandateve, dhe, betimi i deputetëve; Seanca ka ngecur te pika e tretë, zgjedhja e Kryetarit Parlamentit.

Kandidatja e propozuar për Kryetar të Parlamentit nga Lëvizja Vetëvendosje, Albulena Haxhiu, po konsiderohet si figurë përçarëse nga PDK dhe AAK ndërsa LDK është shprehur se nuk voton asnjë kandidat të propozuar nga LVV.

Njoftim:

Gjykata Kushtetuese e Republikës së Kosovës, më 7 gusht 2025 vendosi lidhur me kërkesat KO193/25 dhe KO196/25, në lidhje me vlerësimin e kushtetutshmërisë së  “Vendimit të Kuvendit për votimin e Komisionit për votim të fshehtë, në kuadër të vazhdimit të seancës konstituive të Legjislaturës IX të Kuvendit, të mbajtur sipas transkriptit të datës 29 qershor 2025.”, të parashtruar nga KO193/25, Memli Krasniqi dhe 12 (dymbëdhjetë) deputetë të tjerë të Kuvendit të Republikës së Kosovës dhe KO196/25, Hykmete Bajrami dhe 10 (dhjetë) deputetë të tjerë të Kuvendit të Republikës së Kosovës, bazuar në paragrafin 5 të nenit 113 [Jurisdiksioni dhe Palët e Autorizuara] të Kushtetutës së Republikës së Kosovës.

Gjykata, vendosi:

1. TË DEKLAROJË, njëzëri, kërkesën të pranueshme; 
2. TË KONSTATOJË, njëzëri, që deputetët e zgjedhur të Kuvendit të Republikës së Kosovës nuk kanë zbatuar Aktgjykimin e 26 qershorit 2025, të Gjykatës Kushtetuese të Republikës së Kosovës në rastin KO124/25, dhe rrjedhimisht të gjitha seancat e mbajtura nga data 27 qershor deri më 26 korrik 2025 shpallen të pavlefshme;
3. TË KONSTATOJË, njëzëri, që Kryesuesi i Seancës Konstituive të Kuvendit të Republikës së Kosovës, nuk ka vepruar në pajtueshmëri me  Aktgjykimin e Gjykatës Kushtetuese të Republikës së Kosovës në rastin KO124/25, të 26 qershorit 2025 dhe rrjedhimisht veprimet e tij janë në papajtueshmëri me paragrafin 1 të nenit 116 [Efekti Juridik i Vendimeve] të Kushtetutës së Republikës së Kosovës;
4. TË URDHËROJË, me 6 (gjashtë) vota për dhe 1 (një) kundër, Kryesuesin e Seancës Konstituive të Kuvendit të Republikës së Kosovës të vazhdojë me pikën 3 të rendit të ditës së Seancës Konstituive, të miratuar më 8 prill 2025, dhe në pajtim  me paragrafin 2 të nenit 67 [Zgjedhja e Kryetarit dhe Nënkryetarëve] të Kushtetutësë Republikës së Kosovës, të ftojë përfaqësuesin e grupit më të madh parlamentar për të propozuar kandidatin/en për Kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votimi i cili mund të realizohet vetëm deri në 3 (tre) herë për kandidatin/en e njëjtë
    
5. TË URDHËROJË, njëzëri të gjithë deputetët e zgjedhur të Kuvendit të Republikës së Kosovës, që në pajtim me nenin 4 [Forma e Qeverisjes dhe Ndarja e Pushtetit], nenin 7 [Vlerat] dhe nenin 74 [Ushtrimi i Funksionit] të Kushtetutës së Republikës së Kosovës gjatë procedurës së zgjedhjes së Kryetarit/es dhe nënkryetarëve të Kuvendit të Republikës së Kosovës të jenë të pranishëm dhe të votojnë;
    
6. TË URDHËROJË, me 6 (gjashtë) vota për dhe 1 (një) kundër deputetët e zgjedhur të Kuvendit të Republikës së Kosovës, në pajtim me paragrafët 2, 3 dhe 4 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës të zgjedhin Kryetarin/en dhe nënkryetarët e Kuvendit të Republikës së Kosovës sipas pikave 3 dhe 4 të rendit të ditës të Seancës Konstituive brenda 30 (tridhjetë) ditëve nga dita e hyrjes në fuqi të këtij Aktgjykimi;
    
7. TË VAZHDOJË, njëzëri, masën e përkohshme të vendosur më 24 korrik 2025 deri në hyrjen në fuqi të këtij Aktgjykimi;
    
8. T’UA KUMTOJË këtë Aktgjykim palëve;
    
9. TA PUBLIKOJË këtë Aktgjykim në Gazetën Zyrtare të Republikës së Kosovës, në pajtim me paragrafin 4 të nenit 20 (Vendimet) të Ligjit Nr. 03/L-121 për Gjykatën Kushtetuese të Republikës së Kosovës;
    
10. TË KONSTATOJË që ky Aktgjykim hyn në fuqi në ditën e publikimit të tij nga Gjykata Kushtetuese e Republikës së Kosovës dhe njoftimit të palëve.