Gjykata lëshon urdhër arrest për deputetin që bëri Avdullah Hotin kryeministër
Gjykata Themelore në Prishtinë ka lëshuar sot urdhër arrest ndaj deputetit Etem Arifi, i dënuar me vendim të formës së prerë për mashtrimin me subvencione, që kapin shumën mbi 25 mijë euro.
Urdhri është lëshuar me qëllim për ta dërguar atë në vuajtje të dënimit me burg. Lajmin e ka konfirmuar për RFE zëdhënësja e Gjykatës Themelore në Prishtinë, Mirlinda Gashi.
“Ju njoftojmë se i dënuari E. A e ka pranuar vendimin e Gjykatës së Apelit të Kosovës, me të cilin i është refuzuar ankesa si e pabazuar dhe është bërë i plotfuqishëm vendimi i Gjykatës Themelore në Prishtinë.I dënuari E.A është dashur që pas pranimit të vendimit të lajmërohet në Qendrën për vuajtjen e dënimit me burg, por pasi që i njëjti nuk është lajmëruar, Gjykata ka lëshuar urdhëresë për ndalim, arrestim dhe dërgimin e të njëjtit në vuajtje të dënimit me burg.”
Arifi është i dënuar me një vit e tre muaj burg për veprën penale “mashtrim me subvencione”. Sipas vendimit të gjykatës, deputeti Etem Arifi, së bashku me Bajram Gashin, drejtor i OJQ-së “Zëri i Ashkalinjve”, kanë përvetësuar rreth 26 mijë euro.
Etem Arifin,është deputet në Parlamentin e Kosovës nga Partia e Ashkalive për Integrim. Ai është i njohur për faktin se me votëne tij përcaktuese të votohet edhe qeveria e Avdullah Hotit!
Ndryshe, më 11 Qershor Lëvizja Vetëvendosje ka dorëzuar në Gjykatën Kushtetuese kërkesën për antikushtetutshmërinë e pjesëmarrjes dhe të votimit të deputetit Etem Arifi në seancën për votimin e qeverisë Hoti.
“Me provat që dëshmojnë qartazi se z. Etem Arifi është dënuar me aktgjykim të formës së prerë dhe për rrjedhojë ka humbur mandatin e deputetit, sot, disa deputetë të Grupit Parlamentar të Lëvizjes VETËVENDOSJE! kanë dorëzuar në Gjykatën Kushtetuese kërkesën për antikushtetuetshmërinë e pjesëmarrjes dhe të votimit të z. Arifi, i cili e bën të pavlefshëm dhe jokushtetues vendimin e Kuvendit të Kosovës”, thuhet në komunikatën e lëshuar nga Lëvizja Vetëvendosje duke shtuar se pjesëmarrja e Arifit si dhe votimi i tij për qeverinë Hoti e bën jolegjitime këtë qeveri.
“Pjesëmarrja e z. Etem Arifi në seancë dhe votimi i tij, aq më tepër si votë përcaktuese, e thellon edhe më shumë paligjshmërinë e kësaj Qeverie dhe e bën edhe proceduralisht të paligjshëm vendimin e Kuvendit për votimin e Qeverisë. Është e përcaktuar qartë me Kushtetutën e Republikës së Kosovës se mandati i deputetit humb ose bëhet i pavlefshëm në rast të dënimit për vepër penale me një vit e më shumë burg.”
