Gjykata për krimet serbe në Kosovë, arrihet konsensusi…

Parlamenti i Kosovës ka arritur të gjejë konsensus rreth nismës së kryetarit Kadri Veseli për themelimin e Gjykatës Ndërkombëtare për gjenocidin serb në Kosovë.

Të gjitha grupet parlamentare janë pajtuar që të mblidhen së bashku, në një komision ad hoc, për të harmonizuar qëndrimet që më pas të votohet bashkërisht nisma për themelimin e tribunalit. 

Grupet parlamentare do të harmonizojnë qëndrimet edhe rreth Ditës së Gjenocidit, ndërtimit të Muzeut të Gjenocidit, dhe Muzeut të Debimit.

Debate dhe replika

Deri në arritjen e këtij konsensusi pati debate dhe replika të shumëta madje një moment Kryetari i Parlamentit të Kosovës, Kadri Veseli duke replikuar me Shefin e Grupti Parlamentar të LDK-së, tha se nuk e ka ndërmend të bëhet bajraktar i formimit të Gjykatës Ndërkombëtare, dhe për 20 vjet pas luftës askush asnjë iniciativë nuk e ka ndërmarr as në kuvend as në institucionet tjera për çështjen e gjenocidit serb.

Veseli: Nuk e kam ndërmend me marr flamur për këtë çështje

“U nxita jo vetëm nga ky deklarim i juaji, por edhe nga seanca e kaluar. I nderuari kryetar i GP të LDK-së ne në rend të parë krejt çfarë bëjmë këtu, e bëjmë për hir të një interesi që është qytetar,  qoftë iniciativë ndonjë herë që edhe mund të mos na takoj neve. Për dy dekada, askush asnjë iniciativë nuk e ka ndërmarr as në kuvend as në institucionet tjera për çështjen e gjenocidit serb. Çdo vit kemi vajtuar, kemi fol, por hapa konkret nuk janë ndërmarrë. Pse u deshtë pikërisht kur u mor një iniciativë me pasur gjithë këtë fushatë kaq të rëndë? Pse u deshtë në gjithë këto insinuata, intriga në këtë proces. Në këtë kuvend është folur, janë marrë iniciativa, janë ndërmarrë hapa që kurrë si kanë takuar këtij kuvendi. E nuk u bë kaq shumë zë. Kjo iniciativa nuk ka të bëj as me mua, as me ty… Ju mendoni  si të doni, unë nuk e kam ndërmend me marr flamur për këtë çështje, por ajo që duhet me shkuar deri në fund, është iniciativa,” tha Veseli duke shtuar se Rezolutën do ta hedh në votim dhe të vendos Parlament i Kosovës, mirëpo sipas tij, iniciativa për Gjykatën Ndërkombëtare ka me shkuar deri në fund, pra, institucionet duhet me marrë përgjegjësi jo me manipuluar askush me qytetarët.

Kurti: Gjykata Ndërkombëtar i jep shumë kohë Serbisë

Kryetari i Lëvizjes Vetëvendosje, Albin Kurti tha se ideja për themelimin e Gjykatës ndërkombëtare eshtë e nxituar për shkak se i jep shumë kohë Serbisë, kur dihet se për themelimin e një tribunali të tillë merr shumë kohë.

Kurti tha se Gjykata Speciale me 4 gusht i bën katër vjet prej se është mundësuar me amandamentimin 24 të kushtetutës, për çka tha se edhe pas katër viteve nuk ka as aktakuza, e lëre më gjykime e dënime.

“Të flasësh për Gjykatën ndërkombëtar nuk do të thotë të ngutesh, do të thotë përkundrazi të mos ngutesh. Ideja e Gjykatës Ndërkombëtare i jep kohë Serbisë, i jep kohë kundërshtarit tonë. Pra, në kundërshtim me atë që proklamohet nga kreu dhe zëdhënësit e tjerë të PAN-it, ideja e nxituar për Gjykatë ndërkombëtar në fakt, i jep më shumë kohë Serbisë, që do të kalojnë shumë vjet, derisa të themelohet dhe të filloj funksionimi i një tribunali të tillë. Me këtë ide Serbia sigurohet se edhe për një dekadë nuk do ta gjej gjë. Gjykata ndërkombëtar prej kur lind ideja deri kur themelohet dhe funksionon shumë vjet shkojnë, katër shkuar për Gjykatën Speciale, a kjo është shumë më e madhe se Gjykata Speciale , tha Kurti.

Ideja për Gjykatë ndërkombëtare, Kurti tha se është të ecet ngadalë, e ky tribunal sipas tij merr shumë vjet. Ai tha se tashmë po vdesin edhe dëshmitarët, dhe se Kosova  po dobësohet në ndjekjen e krimit.

 “ Pra propozimi është ky: Le ta mundësojmë gjykimin në mungesë dhe le të punojnë proklurorët tanë. Kemi mjaftueshëm deputetë slt, ja po e vejmë në rend të ditës.. nëse duam të ngutemi kjo është rruga,  nëse duhet të vonohemi rruga është Gjykata ndërkombëtare,” tha Albin Kurti.