Gjykata Speciale liron nga burgu Nasim Haradinajn

Dhomat e Specializuara në Hagë sot kanë modifikuar dënimin ndaj ish-nënkryetarit të Organizatës së Veteranëve të Luftës së Ushtrisë Çlirimtare të Kosovës, OVL-UÇK, Nasim Haradinaj.

Modifikimi i mundëson Haradinajt lirimin nga burgu, nën disa kushte, kanë njoftuar Dhomat e Specializuara në Hagë, raporton RFE.

Në maj të vitit 2022, Haradinaj, së bashku me kryetarin e atëhershëm të OVL-UÇK, Hysni Gucati, u dënuan me katër vjet e gjysmë burgim për akuzat për pengim të drejtësisë.

Më pas, Apeli ua uli dënimet për tre muaj.

Gucatit iu modifikua dënimi më 17 tetor, që i mundësoi lirimin nga burgu, me kushte.

Haradinaj e Gucati ishin arrestuar më 5 shtator të vitit 2020, për t’u dërguar në Hagë.

Sipas njoftimit, kryetarja e Dhomave të Specializuara, Ekaterina Trendafilova, konstatoi se “Haradinaj pati mundësi të reflektonte për veprimet e veta gjatë mbajtjes së tij në objektin e paraburgimit”.

“Në bazë të raportit ai kishte respektuar rregullat e objektit të paraburgimit gjatë muajve të fundit”, thuhet në njoftim.

“Trendafilova, po ashtu, mori parasysh pendesën e z. Haradinaj dhe zotimin e tij se nuk do të përfshihej në veprime të tjera që mund të karakterizoheshin si vepra penale kundër administrimit të drejtësisë dhe se do t’i përmbushë të gjithë kushtet e përcaktuara për lirimin e tij,” theksojnë Dhomat e Specializuara në Hagë përmes njoftimit duke përfunduar:

“Haradinaj nuk përmbush cilindo prej kushteve të përcaktuara në vendim, atëherë vendimi do të anulohet.”