Gjykata Speciale në shtëpinë e Jakup Krasniqit, Avokati: Jakupi pritet të transferohet në Hagë!
Mëngjesin e sotëm forcat të shumta policore nga EULEX kanë bastisur shtëpinë e Ish-Kryetarit të Parlamentit të Kosovës, Jakup Krasniqi. Nga Gjykata Speciale kanë sqaruar se Zyra e Prokurorit të Specializuar, ZPS, është duke kryer një operacion në Prishtinë.
Nga Dhomat e Specializuara thuhet se operacionet e ZPS-së po kryhen me mbështetjen e Policisë së Kosovës dhe Misionit të BE-së për Sundimin e Ligjit në Kosovës, EULEX.
“Zyra e Prokurorit të Specializuar, ZPS, aktualisht është duke kryer operacione në Prishtinë. Operacionet e ZPS-së po kryhen me mbështetjen e Policisë së Kosovës dhe Misionit të Bashkimit Evropian për Sundimin e Ligjit në Kosovë, EULEX,” thuhet në njoftimin e Dhomave të Specializuara duke premtuar se më vonë do të japin më shumë informacione.
E nipi i Jakup Krasniqit tha për KosovaPress se nuk ka pasur më parë ndonjë njoftim paraprak. Ai është i zhgënjyer sesi askush nga familjarët nuk është lejuar të afrohet tek shtëpia e Jakup Krasniqit, ku edhe po qëndrojnë forca të shumta policore nga njësia e EULEX-it.
“Momenteve të fundit nuk ka pasur diçka konkrete të tillë. Për rastësi unë edhe mbrëmë kam qëndruar me të deri vonë ndejë krejt familjare, nuk është vërejtur diçka. Ajo çka ne e dimë është që prej orës 5-6 të mëngjesit kanë ardhë këtu me gjithë këtë numër të madh të veturave dhe numër të madh të policëve. Ajo që po na shqetëson është se nuk po na lënë të afrohemi për të parë se nëse ka nevojë për diçka. E vërteta është se kanë ardhur, nuk kemi pasur njoftim. Edhe ne jemi spektatorë sikur ju,” tha ai duke shpreh bindjen e tij të plotë në pastërtinë e luftës së Jakup Krasniqit.
“Është ditë që njerëzit që kanë qenë pjesë e UÇK-së do të ballafaqohen me këto gjëra. Unë jam i bindur në atë se ky nuk mund të përfaqësoj pjesën kriminale, nuk ka të bëjë me atë far pune. Pjesën tjetër mbetet të shohim.”
Ndërkohë zëdhënësi i Policisë së Kosovës, Baki Kelani, ka konfirmuar se Policia e Kosovës është duke asistuar në aksionin që po zhvillon Zyra e Prokurorit të Specializuar në disa lokacione në kryeqytet
“Policia e Kosovës, sipas nevojës, vlerësimeve dhe kërkesës së EULEX-it, iu asiston në ruajtjen e rendit, qetësisë dhe sigurisë publike si dhe mbarëvajtjes së trafikut,” tha Kelani duke mos dhënë detaje të tjera.
Gjatë ditës së sotme pritet transferimi i Jakup Krasniqit për në Hagë. Kështu ka bërë të ditur, avokati mbrojtës Valon Hasani, i cili ka njoftuar se aktakuza është konfirmuar.
“Krejt çfarë mund të konfirmojë është që ka një bastisje… Aktakuza e cila është konfirmuar, tash duhet të transferohet zotëri Krasniqi në Hagë, besoj gjatë ditës së sotme”, ka deklaruar Hasani për KosovaPress.
Ndërkohë që pjesëtarët e EULEX-it po qëndrojnë në oborrin e familjes Krasniqi edhe në fshatin Negrovc të Komunës së Drenasit, që është edhe vendlindja e Jakup Krasniqit, shtëpia e së cilit po bastiset sot në Prishtinë.
Mësohet në shtëpinë e tij në fshat nuk ka bastisje, meqë po priten anëtarët e familjes.
