Gjyqi ndaj Shullazit, prokuroria kërkon edhe dy javë kohë për pretencën…
Pretenca për Emiljano Shullazin dhe katër anëtarët e grupit të tij do të jepet më 10 korrik. Seanca e sotme gjyqësore është shtyrë sot me kërkesë të Prokurorisë së Krimeve të Rënda pasi kjo e fundit nuk ka qenë e gatshme për të paraqitur konkluzionet përfundimtare.
Ne seancën e shkuar, avokatët kërkuan pyetjen e tre dëshmitarëve të tjerë, kryesisht punonjës të një banke të nivelit të dyte, por kjo kërkesë nuk u pranua nga gjykata, e cila administroi provat shkresore dhe i dha fund shqyrtimit.
Të pandehurit Emiljano Shullazi, Gilmando Dani, Besmir Shullazi, Endrit Qyqja, Endrit Zela akuzohen për disa vepra të rënda penale, të kryera në periudhën 2014-2016, për të cilat rrezikojnë denime deri në 15 vite burg.
Veprat penale
-“Shtrëngim me anë të kanosjes për dhënie pasurie”, në dëm të shtetasve Ylvi Beqja, Jani Zaka dhe Adriatik Kërçuku
-Kanosje për shkak të detyrës, në dëm të shtetasve Mynyr Kone dhe Dhori Kule
-“Shkatërrim prone me eksploziv”, në dëm të pronës së shtetasve Jani Zaka dhe Adriatik Kërçuku
-“Grup i strukturuar kriminal”
-“Veprime në kuadër të grupit të strukturuar kriminal”
Prokuroria i akuzon të pandehurit se duke vepruar si grup i strukturuar kriminal kanë shtrënguar me anën e kanosjes shtetasin Ylvi Beqja dhe ky i fundit i kaloi në pronësi Emiljano Shullazit një pjesë të ish-hotel “Vollga” në Durrës, si edhe shuma të konsiderueshme monetare.
Sipas akuzës në janar 2016, të akuzuarit kanë shtrënguar për dhënie pasurie shtetasin Adriatik Kërçuku, i cili ishte pronar i një biznesi në Lushnje.
Dy muaj pas kërcënimeve ndaj këtij shtetasi, konkretisht në Mars 2016, pjesëtarët e grupit, akuzohen se kanë vendosur dhe shpërthyer lëndë plasëse tritol në ambjentet e biznesit të të dëmtuarit Adriatik Kërçuku.
Në shkurt 2016, grupi akuzohet se kanë shtrënguar për dhënie pasurie shtetasin Jani Zaka, i cili posedonte pronë në Tiranë, ku akuzohen se i kanë vendosur lëndë shpërthyese tritol një garazhdi në pronësi të tij, në shenjë kërcënimi për qëllime përfitimi të paligjshëm.
Në Prill 2016, të pandehurit akuzohen se kanë kanosur për shkak të detyrës shtetasit Dhori Kule dhe Mynyr Koni, pedagogë dhe drejtues në Universitetin e Tiranës, me qëllim që profesor Koni të largohej nga gara për Rektor në këtë Universitet.
