Gjyqi Publik, Berisha: SPAK, organ i kontrolluar pa pamëshirë nga Edi Rama!

Duke vazhduar sot me Gjyqin Publik ndaj Kryeministrit Edi Rama, Kryetari i Partisë Demokratike, Sali Berisha, publikoi dokumente që zbardhin aferën Rama-Bolino ndërsa prokurorët e SPAK-ut i cilësoi si pjesë integrale të krimit shtetëror që nuk kanë asnjë lidhje me ligjin dhe të drejtën.

Gjyqin Publik, sot Kryetari i Partisë Demokratike e filloi me një minutë heshtje për gjeniun e skenës dhe filmit shqiptar, Mirush Kabashin, i cili mbylli sytë përgjithmonë.

“Së pari, sot është një ditë zie për artin, artdashësit, kulturën tonë. Një gjeni i skenës shqiptare dhe filmit shqiptar, mbylli sytë përgjithmonë. Mirush Kabashi nuk është më.

Mirush Kabashi ishte një nga talentet më të rralla, një nga artistët më të shquar, më të talentuar të filmit dhe teatrit shqiptar.

Ai interpretoi mbi 100 role, personazhe të veprave të autorëve tanë dhe botërorë. I interpretoi ata me mjeshtëri të madhe.

U bë i pavdekshëm me rolet e tij.

Mirush Kabashi u nda nga ne si Sokrati i kohës sonë dhe u nis në përjetësi.

Duke shprehur ngushëllime më të ndjera familjes, të afërmve dhe të gjithë admiruesve të tij, u ftoj të nderojmë kujtimin e artistit të madh me një minutë heshtje,” tha Sali Berisha duke vazhduar me Gjyqin Publik.

“Tani vazhdojmë gjyqin ndaj hajdutit më të madh në historinë e shtetit shqiptar, por edhe në kohëra, gjyqin ndaj Edi Ramës.

Në një seri seancash kemi paraqitur këtu, me fakte, dokumente, se si Edi Rama me 4 vendime qeveritare të personalizuara, të personalizuara, rrëmbeu me Karlo Bolinon 4900 metër tokë pronarëve.

Se si Edi Rama me Bolinon e tij, apo duke përdorur emrin e Bolinos, mori nga toka e Begejve, tre herë më shumë se pasardhësit e tyre.

Se si për të rrëmbyer këtë tokë, firmosi 4 vendime qeveritare, ndërkohë që mban në arrest, njeriun që ka marrë në përputhje me të gjitha lidhet dhe asnjë vendim të personalizuar, atë që ka marrë 408 metër tokë, vetëm e vetëm për motive politike.

Ju jeni njohur me aktin e pashembullt të katër vendimeve për grabitjen e tokës. Ja ku janë të gjitha vendimet e personalizuara për kompaninë që ai ka me Bolinon e tij.

Dhe kjo tokë është marrë gjimnazit. Rama me Bolinon kanë përvetësuar tokën, e cila në planin rregullator të përgjithshëm të Tiranës, në rrugën Ndre Mjeda, caktohet ndërtimi i shkollës së mesme.

Ky është një krim i dyfishtë, është një vjedhje në vakëf, është një vjedhje për fëmijët e territorit ku do ndërtohej shkolla. Është një pamëshirësi e madhe.

Desha të paraqes para jush këtë dokument të veçantë. Çfarë tregon? Ky dokument se në buletinin numër 29 me datë 22.07.209, Agjencia e Prokurimit Publik dhe Ministria e Financave publikojnë njoftimin për dhënie me qira të pasurisë 7/649 me sipërfaqe të përgjithshme 4021 metra katrorë.

Ishte e para kjo, pasi shtoi 800 e ca metra këtu Rama. Me vendimin e dytë, Rama shton 800 e ca metra.
Pra, dhënien me qira, e cila thotë se vlera dysheme për detyrimin e qirasë për fillimin e konkurrimit është 631 mijë lekë në muaj. Se ishin tre ndërtesa.

Nëse i mblidhni për një vit, bëjnë 74 mijë euro në vit. Në 20 vite, bëjnë 1 milion e 400 mijë euro. Pra, vetëm sikur me qira të jepej, nga ky territor, qytetarët e Tiranës fitonin 1.4 milionë euro.

Çfarë ndodh? Me deus ex machina, kalohet nga 63 mijë euro qiraje, Denaj me Ramën e kalojnë në 1 euro.
Dy muaj mbrapa bëjnë vendimin dhe zonën e marrin bashkë me Bolinon me 1 euro. Pastaj ndryshojnë edhe kontratën dhe e shtojnë edhe me 800 metër katrorë. Me të tretën, vendosin fshirjen e objekteve,” tha lideri i opozitës duke bërë të ditur se ishte vetë Edi Rama ai i cili firmosi vetë lejen e ndërtimit për godinën 3-katëshe të Bolinos, gj që nuk ndodh as në diktaturë.

“Leja e ndërtimit e Edi Ramës për Karlo Bolinon ëshët unike në botë.

Nuk ka kryeministër në botë, që të firmosë në detyrë, një leje ndërtimi për një ndërtesë trekatëshe.
Është unike. Është unike! Është dëshmi e përqendrimit të të gjithë pushtetit të tij për të vjedhur dhe grabitur.

Pse e ka firmosur vetë? Sepse ka pasur frikë se këshilli do bëjë zhurmë të madhe kur të mësojë se po grabit tokën e shkollës.

Nuk ndodh, nuk gjen në të gjithë diktaturën komuniste në Shqipëri, një leje ndërtimi e firmosur nga Mehmet Shehu, apo nga pasardhësi i tij.

Kjo ndodh vetëm në një vend ku një njeri, që për t’u pasuruar vetë, është i gatshëm të ushtrojë çdo lloj pushteti, vetëm për të vjedhur.

A ka dëshmi më flagrante se kjo leje, për një ndërtesë trekatëshe, e firmosur nga kryeministri, jashtë çdo lloj kodi dhe ligji.

Natyrisht jo vetëm nga kryeministri, se pjesa tjetër është nga Anila Denaj, leja për të ndërtuar në territorin e vjedhur.

Ky është dokumenti, i cili dëshmon edhe njëherë në mënyrën më flagrante, aktin skandaloz të rrëmbimit të 4900 metra tokë, të cilën pronarët e lanë vakëf për ndërtimin e shkollës së mesme në territorin ku nuk kishte një të tillë.

Kjo ishte ajo që doja të paraqisja, nesër ose pasnesër do ju njoh me një seri dokumentesh të tjerë që faktojnë veprat e penale që kanë kryer Rama dhe Bolino në këtë vjedhje skandaloze.

Në këtë vjedhje të pashembullt.

Por thashë sot të mbetemi te dokumenti. Ja ku janë dy mafiozë të kalibrit jo shqiptar, por në dy gadishuj, shokë nuk kanë përveç vetes së tyre.”

I pyetur na mediat nese këtë dosje do ta dërgoj në SPAK, Kryetari i Partisë Demokratike tha se kjo do të ishte tallje me ligjin sepse sot dihet që SPAK është organ i kontrolluar në mënyrën më të pamëshirë nga Edi Rama.

“Të dërgosh dosje në SPAK për Edi Ramën, do të thotë të tallesh me ligjin dhe të drejtën.

SKAP-i sot është një organ i kontrolluar në mënyrën më të pamëshirë, më denigruese nga Edi Rama.

Ju jeni dëshmitarë se si ai urdhëron larot e tij për të marrë pushtetin e parlamentit, të bëhen pjesë e puçit antikushtues të Edi Ramës dhe të përcaktojnë heqje lirie për dalje jashtë vendit për kryetarin e PD, pa marrë leje parlamenti.

Kur skapistët dhe gjykatësit kalojnë në një shkallë të tillë, ata janë pjesë integrale e krimit shtetëror dhe nuk kanë asnjë lidhje me ligjin dhe të drejtën. Ata janë një korporatë kriminale me qeverinë, që zbatojnë urdhra të tillë.

A mund të thuash fjalë të tjera për njerëzit e antiligjit?

E kam theksuar dhe e theksoj, Arben Kraja është ish-oficer i policisë sekrete të Enver Hoxhës. Ligji aktual i prokurorisë së shtetit e nxjerr atë jashtë detyre. Por rri aty si laro i Edi Ramës për të zbatuar urdhrat që keni parë ju vetë.

Për të përcaktuar masa arresti dhe ndalimi për të dalë jashtë shteti për kundërshtarët politikë, të cilët nuk kanë shkelur asnjë ligj, asnjë nen.

Apo Melonai që për lidhjet e saj obskure me njërin nga eksponentët më kryesorë të krimit të organizuar në Shqipëri e rajon, Taulant Ballën, deklaron në sallën e gjyqit se korrupsioni konsumohet duke zbatuar ligjin.

Shpikja e një bande kriminale që shkelmon ligjin, që fuzionon amoralitetin me moralin, integritetin me depersonalizimin, një shërbëtore e mjerë e krimit dhe Edi Ramës.

Për të mos thënë për gjykatësen që fshihet prapa krimit të saj, që nuk ka asgjë të përbashkët me një gjykatëse, përveç fshehjes që bën prapa krimit të saj dhe aferave.

A jam i qartë tani në lidhje me problemin e SKAP-it? A mund të dërgohet apo jo, kjo nuk ka rëndësi të madhe.

Edhe mund të dërgohet sepse ekzistenca e institucioneve është një realitet dhe ato meritojnë të shpëtohen, njëlloj si Shqipëria, nga Edi Rama.

Se ato janë bërë pjesë e luftës politike të Edi Ramës ndaj opozitës.”

Në fund, ka shuajt dhe interesin e mediave nën kontrollin e Edi Ramës se kur do nis mosbindja civile duke theksuar se ka një revoltë të madhe dhe strukturat janë të gatshme kur t’u jepet sinjali për të filluar.

“Dy momente mund të theksoj.

Së pari, është një bindje universale se në Shqipëri është instaluar diktatura dhe Shqipëria po jeton në kushtet e grushtit të shtetit brenda shtetit, të bërë nga Edi Rama duke marrë pushtetet parlamentit.

Ky është grusht shteti brenda shtetit.

Së dyti, ka një revoltë të madhe dhe strukturat janë të gatshme kur t’u jepet sinjali për të filluar.

Se kur, kjo do përcaktohet nga organet.

Nuk mund të them se do lihet pas festës apo para festave, por një gjë është e sigurt, ju do e mësoni në kohën më të parë kur shpallet,” tha Kryetari i Partisë Demokratike, Sali Berisha, duke e bërë të qartë se mosbindja civile në parlament është mënyra se si opozita po i përgjigjet grushtit të shtetit brenda shtetit.

“Asgjë nuk e dekurajon opozitën.

Taulant Balla është simbol i krimit në qeveri, është ikona e zezë e trafiqeve. Është përfaqësuesi më i shëmtuar i grupeve më të rrezikshme kriminale të Shqipërisë, me dokumente.

Kurse mosbindja civile në parlament është mënyra se si opozita po i përgjigjet grushtit të shtetit brenda shtetit nga puçisti Edi Rama.”