Gjyqtari Aleks Nikolli lirinë ia fali Dritan Dajtit por jo vetes! KPK e shkarkon…
Komisioni i Pavarur i Kualifikimit, KPK, ka shkarkuar sot nga detyra gjyqtarin e Gjykatës së Apelit në Shkodër, Aleks Nikolli.
KPK konstatoi mungesë burimesh të ligjshme dhe ngriti dyshime për veprime fiktive nga ana e gjyqtarit Nikolli, ndërsa ky i fundit kundërshtoi analizën financiare dhe kërkoi konfirmim.
Komisioni konstatoi pamundësi financiare për ndërtimin e një shtëpie trekatëshe në fshatin Ishull Shëngjin të Lezhës, ku gjyqtari Aleks Nikolli rezulton si pronar i katit të dytë me sipërfaqe 147.8 m2.
Aleks Nikolli është diplomuar për drejtësi në Universitetin “Luigj Gurakuqi” në Shkodër dhe nga viti 2001 deri në vitin 2004 ai ka mbaruar studimet në shkollën e Magjistraturës. Në vitin 2015, Nikolli ka marrë titullin “Doktor shkencash” në Universitetin Europian të Tiranës. Nga viti 2004 deri në vitin 2016 ka shërbyer si gjyqtar në Gjykatën e Rrethit Gjyqësor Shkodër dhe nga viti 2016 si gjyqtar në Gjykatën e Apelit Shkodër.
Për opinionin shqiptar Aleks Nikolli u bë si gjqytar i njohur pasi në vitin 2019 ishte një nga gjyqtarët që prishën dënimin me burg përjetë për Dritan Dajtin, i dënuar për vrasjen e 4 policëve. Po këtë viti, Nikolli u vu nën hetim për korrupsion nga ish-Prokuroria e Krimeve të Rënda. Megjithatë, procesi i vetingut u mbyll vetëm me kriterin e pasurisë. Nikolli kërkoi dorëzimin e provave të reja dhe riçeljen e hetimit për dy kriteret e tjera, profesionalizmin dhe pastërtinë e figurës. “Nuk ka pse seanca të zhvillohet vetëm më një kriter. Është jo vetëm paragjykim, por edhe nuk jepet e drejta të trajtohet gjithë kontributi im në aspektin profesional”, tha Nikolli.
Gjithsesi, sot Aleks Nikolli nuk është pjesë e sistemit të drejtësisë dhe për këtë ka vendosur trupi gjykues që realizoi procesin e rivlerësimit për gjyqtarin Nikolli: Brunilda Bekteshi kryesuese, Olsi Komici relator dhe Lulzim Hamitaj anëtar.
