Gjyqtari me mëkatin “30 Qershor”, KPA e shkarkon Artur Malajn për pasuri
Kolegji i Posaçëm i Apelimit, KPA, ka shkarkuar sot nga detyra gjyqtarin e Gjykatës Administrative të Apelit, Tiranë, Artur Malaj.
Në vendimin e saj, KPA thekson se subjekti i rivlerësimit kishte kryer deklarim të pasaktë dhe të pamjaftueshëm të pasurisë.
Artur Malaj kur fillimisht u konfirmua në detyrë nga KPK më 3 gusht 2018 nga trupa gjykuese e drejtuar nga Genta Tafa Bungo, realtore Suela Zhegu dhe Pamela Qirko anëtare, nuk u përballë me ndonjë çudi nga opinion publik meqë u konsiderua si shpërblim i Kryeministri Edi Rama për shpërblimin që Malaj i bëri me vendimin gjyqësor kur u rrëzua Dekreti i Presidentit për anulimin e datës 30 Qershor ndonëse nuk kishte kurrfarë kompetence kushtetuese dhe këtë së fundi e konfirmoi edhe Raporti i OSBE-ODIHR. Por Operacioni Ndërkombëtar i Monitorimit vendosi të ankimojë vendimin e KPK.
“Operacioni Ndërkombëtar i Monitorimit u ka paraqitur Komisionerëve Publikë rekomandimin për ta ankimuar në Kolegjin e Posaçëm të Apelimit vendimin e Komisionit të Pavarur të Kualifikimit për konfirmimin në detyrë të z. Artur Malaj.”
Dhe, sot kriteri i pasurisë e rrëzoi përfundimisht gjyqtarin e Gjykatës Administrative të Apelit, Artur Malaj.
Trupa e Kolegjit përbëhej nga gjyqtarja Rezarta Schuetz si kryesuese, Sokol Çomo relator dhe Ina Rama, Ardian Hajdari dhe Luan Daci anëtarë.
Ndryshe, Artur Malaj ka një karrierë të gjatë në sistemin e drejtësisë dhe prej korrikut 2013 është gjyqtar i Gjykatës Administrative të Apelit. Ai ka drejtuar Gjykatën e Vlorës nga viti 2004 deri në vitin 2013; kur u promovua nga presidenti i Republikës si gjyqtar në Gjykatën Administrative të Apelit. Malaj ka qenë gjithashtu edhe anëtar i Kolegjit Zgjedhor.
