nga Agim Popoci
Lejoi mbjelljen e gjithë tokës shqiptare me marijuanë për të rritur mirëqenien, mburret se ka mik Alexin e Sorosëve, i bie në gjunjë Melonit, nuk e fshehë miqësinë me Erdoganin, renditi shtetin që drejtoi si më të korruptuarin në Evropë, lejoi shndërrimin e tregtimit të bananeve me kokainë në trafikun e kokainës me banane, por, në komunikim me liderët perëndimor kompleksohet vetëm pse është Kryeministër i një shteti me shumicë myslimane!
Me togfjalëshin “Gjyshja ime katolike” që Edi Rama përdor me të huajt, është i bindur se e largon shtetin që drejton nga epiqendra kriminale, dhe për Brukselin e Washingtonin, mjafton vetëm të mos jesh mysliman!
Por, nga Jerusalemi në Londër, broçkullat që ai ndërlidh me Gjyshen e tij katolike fillojnë të kutërbojnë kur ai e lartëson deri në dialogimin me citimet latine, që ku e ku pështirosin me mençurinë e pakrahasueshme të shkencëtarëve që Edi Rama njeh në Shqipëri!
Dhe, pika që derdhi gotën e këtij komunikimi të fëlliqur dhe jo vetëm imagjinar me Gjyshen e tij katolike që përdoret me çdo joshqipfolës, ishte debati me politikanin britanik, Nigel Farage!
“Gjyshja ime katolike, Zoti e mëshiroftë, më kujtonte shpesh një proverb latine: ‘Errare humanum est, sed perseverare diabolicum.’ Që e përkthyer do të ishte: Të gabosh është njerëzore, por të këmbëngulësh në gabim është djallëzore…” ishte fillimi i përgjigjes së sforcuar të Ramës drejtuar Farage, që në vazhdim tregon se kemi të bëjmë me një nip përveç se aspak të mençur të një Gjysheje katolike edhe një Kryeministër të painformuar që ka marrë edhe kot, dhe do të hyjë në histori se s’bënë duke anëtarësuar Shqipërinë në BE dhe duke mbuluar krimin shtetëror me shoshë!
E para, ky nuk është proverb latin, thënia i atribuohej filozofit Seneka, pas veprës së tij Controversiae IV.III u keqinterpretua, si ide ekzistonte në shkrimet e Menandrit në shekullin e IV-të para Krishtit, te Philippicae XII.5 e Ciceronit, katër shekuj më vonë, Shën Jeronimi shkroi në Epistolae (57), dhe, në fund, ky citim u dëshmua te autori neolatin i shekullit të XVII-të, Melchior de Polignac, në poemën e tij të gjatë Anti-Lukrecius; Fakte këto që sikur të kishim të bëjmë me një debatues me nivel, gjithçka do të mbyllej me denigrimin e një shtetari shqiptar, pikërisht ashtu siç e imagjinon me vite të tëra në kokën e tij, Nigel Farage!
E dyta, jo pak e rëndësishme, sikur të ishte i informuar, Edi Rama nuk kishte pse ta ngatërronte dynjanë me Gjyshen e tij katolike, kur, si ai ashtu dhe Nigel Farage nuk mund ta dinë se sa shtetas shqiptarë jetojnë në Mbretërinë e Bashkuar, ndonëse Farage mund ta dijë se sa shqiptarë janë në burg dhe Rama me Taulant Ballën e dinë se sa vota shqiptare kanë arritur të mbledhin më 11 Maj nga patronazhistët e tyre!
Nëse për një ngadhënjim në dialog me një antishqiptar si Farage ia vlen të marrësh në qafë gjithë ata shqiptarë që janë betuar si shtetas britanik pasi janë paraqitur si shqiptarë të ardhur në vitet ’90 nga vatrat e luftës në Kosovë, Luginë të Preshevës ose Maqedoni, duke i lënë sot pa shtetësi britanike pse kanë gënjyer sepse në të vërtetë ata janë nga Shqipëria, kjo është histori tjetër, dhe aspak e çuditshme kur vjen nga një njeri si Edi Rama!
Në fund, Edi Rama mund ta ketë bluar në kokën e tij se bota perëndimore mund ti mbyll sytë para këtij pushteti kriminal në prag të anëtarësimit të Shqipërisë në BE vetëm pse Kryeministri i këtij shteti ka “Gjyshe katolike”, mund ta ketë projektuar veten se s’bënë me gjurmë të thella në historinë shqiptare, por, nuk e fsheh dot paditurinë e tij në ekstrem sikur kur flet për Gjyshen e tij ashtu dhe shtetin që qeverisë; I cili nuk është i njohur pse është me shumicë myslimane por sepse është shteti më i korruptuar në Evropë, dhe, me trafikun më të madh të marijuanës dhe kokainës në Evropë dhe jo vetëm!
Gjyshja e tij katolike, Zoti e mëshiroftë, mund të ketë pasur mençuri të pakrahasueshme me të gjithë shkencëtarët që Edi Rama njeh në Shqipëri, por shtrohet pyetja se sa dhe çfarë shkencëtarë njeh ky njeri!
Historia shqiptare, ku Edi Rama fut hundët çdo ditë e më shumë për të zënë vend, nuk e përmend një Zonjë kaq të mençur në asnjë fjalë të saj, madje as në Shoqërinë e Gruas Shqiptare që ato kanë pasur një kontribut të madh në shtetndërtim si në Shkodër, Tiranë, Vlorë e Gjirokastër!
Në protokollin e kësaj Shoqate kanë qarkulluar dokumente të ndryshme komunikimi nga Dom Lazër Shantoja, Kryetari Parlamentit Musa Juka, Ministri i Brendshëm Ahmet Zogu, Ministri i Financave Ndoc Çoba, Mbreti Zog, Princesha Sanije e deri tek Mustafa Kruja, por nga viti 1917 asgjëkundi nuk kishte as Zonjusha Veronika dhe as Vajza e Gjon Kolombit, siç firmosej në atë kohë!
Jo rastësisht në shoqatën e parë të grave e cila u themelua në Shkodër, nënkryetare e më pas edhe kryetare ishte një Gjyshe katolike, jo e Edi Ramës, por, Jozefina Topallit; Por, edukata e saj dhe fisnikëria e lindur i lejojnë të flas për Gjyshen Shaqe Çoba, krenare që ishte shqiptare dhe e palodhur që edhe në atë klimë patriarkale të drejtoj një shoqatë ku Zonjat quheshin me emër burri dhe Zonjushat si vajzat e baballarëve!
E kur shteti nuk drejtohej nga komunistë si Edi Rama, Ne dhe Ata, nuk përdorej ashtu si dhe fyerja “malok” sepse edhe Kryetarja e Shoqërisë në Vlorë quhej Zonja e Syrija Bej Vlorës!
Kështu Gruaja Shqiptare arriti të themeloj shoqatë edhe në Korçë e Gjirokastër, prej nga u propozua dhe iu dërgua nga Tirana në vitin 1919 edhe një Letër Zonjës së Parë të SHBA që të ndërhyjë te Presidenti Woodrow Wilson për të hedhur poshtë pretendimet greke dhe të mbrohet ky komb i vogël nga barbarizmat greke.
Letra është sigluar nga shumë Gjyshe Shqiptare katolike, myslimane e ortodokse, Zonja e Zonjusha të nderuara Fico, Babameto, Giga, Dabulla, Bogdo, Karalli, Cuberi, Guri, Meksi, Selfo, Papapano, Xhika e Kadare, por nuk kishte as Veronika, as Marie dhe as Kolombi!
Dhe jo vetëm kaq!
Kjo histori e gruas shqiptare mund ti shërbej Edi Ramës se si të komunikoj me kolegët e tij britanik nga Kryetarja e Shoqërisë Perlindia Shqiptare në Korçë, Evanthia Kotta, kur në prillin e vitit 1924 komunikonte me homologen e saj në Inglitera, Lady Aberdea, pa i folur për Gjyshen e saj ortodokse!
Si dhe, të mos kompleksohet nga asnjëri që nuk flet shqip pse në këtë tokë ka dhe Gjyshe Myslimane, madje shumë të forta! Përballuan osmanët, serbin, vëllain e tyre Enver Hoxhën, pasardhësin e tyre Edi Ramën, dhe, sot zënë vend të madh në historinë e kombit shqiptar, madje shumica prej tyre nuk kanë ditur asnjë proverb latin!
Nëse i duhen shembuj, ja është Gjyshja ime Myslimane, me nëntë fëmijë që rriti dhe shkolloi nga Elbasani në Prishtinë me një të vetëm pa oreks për shkollë, familje e cila u shkërmoq nga regjimi serb sepse nuk e deshtën komunizmin!
Fëmija i parë i Gjyshes time Myslimane, Sefedin Firza, që në shtatorin e viti 1945 e kuptoi se çfarë tmerri për kombin shqiptar është Komunizmi, dhe iu bashkua lëvizjes NDSH, me qëllimin kryesor, bashkimin e trojeve shqiptare!
Gjyshja e djalit të parë të Gjyshes time Myslimane gjithashtu ishte myslimane por kjo nuk e pengoi që ti bashkohet një lëvizje e cila kryesohet nga një profesor i nderuar Gjyshja e të cilit ishte Katolike, Gjon Serreçi!
Këtë lëvizje Edi Rama dhe të ngjashmit e tij e njohin se ekzistonte për të ngrënë pula, banda balliste, por Gjyshja ime Myslimane, që nga dita kur komunizmi shkeli në Kosovë, nuk e pa dritën e diellit me sy por ishte e qartë edhe pse djali i saj nuk i pa pulat me sy; Regjimi i cili e kundërshtoi dhe e kundërshton bashkimin e trojeve shqiptare i përjashtoi djalin nga Gjimnazi i Prishtinës, një vit më pas e arrestoi dhe sot e gjithë Kosova krenohet me këtë njeri që drejtoi lëvizjen NDSH, në Ferizaj!
A e kupton këtë Edi Rama, natyrisht se jo, dhe arsyeja e vetme nuk është pse Gjyshja ime Myslimane nuk citonte Senekën ose De Polignacun!
Gjyshja ime Myslimane nuk edukoi fëmijë ta urrejnë kombin shqiptar, të varin poetët e tyre, të shesin tokën shqiptare, të blejnë lirinë e tyre, dhe, ti përkulen atij që ka krijuar bindjen se ka në grusht fatin tënd!
Gjyshja ime Myslimane mund të tregonte shumë proverba por jeta e saj ishte një makth i vërtetë sa ju ra për hise edhe të ngjashmëve të Edi Ramës të krijojnë idenë se kanë në grusht fatin e saj ashtu siç menduan se Veriun e kishte falë Rankoviçi. Kur Avokati Bajram Kelmendi po numëronte ditët e burgut të djalit të Gjyshes time Myslimane që mund edhe ti reduktonte, i bëri një ofertë por ajo i tha se nuk kishte para!
I bëri me gisht nga medaljoni që kishte varur në qafë, dhe në vërejtjen e Gjyshes time Myslimane se e kishte kujtim nga Mamaja, avokati i batonëve ishte i prerë:
-Mos thuaj se nuk ke para!
Gjithsesi, e prerë ishte edhe Gjyshja ime Myslimane që nuk iu përkul dhe mbeti e nderuar ashtu si edhe gjatë hetimit, tek të gjitha Gjyshet katolike në Ferizaj dhe jo vetëm, deri sa i biri përfundoi dënimin; Histori kjo që mund ti shërbejë Nigel Farage nëse jetëson atë takimin imagjinar të Edi Ramës me Chat GPT, jo vetëm pse urren komunizmin por sepse përballë ka një komunist të pist me Gjyshe katolike që nuk ndryshon dot, ka lindë i kuq!