Gjyshja n’interpelancë
nga Agim Popoci
Nëse ka një kujdes që ligjvënësi i ka kushtuar Kryeministrit Edi Rama është “interpelanca urgjente” dhe çuditërisht ai këtë favor e refuzon!
Ulet, shtrydhë gjithë idiotizmin që ka në tru të ngarkuar nga Batoni dhe Fuga, dhe arrin të qëndis aq shumë radhë për t’i thënë miletit se pse e refuzon interpelancën urgjente që me shumë dashamirësi ia kërkoi Kryetari Grupit Parlamentar të PD!
Dashamirësi, sepse ishte në favorin tij dhe nuk kishte vend as për kundërshtim dhe as arsyetim se duhet të mbarojë “njëherë punë me ata andej dhe të thuhet e gjithë vërteta në italisht, pastaj patjetër do t’u vijë radha edhe këtyre këtej”! Ndryshe, sot shqiptarët nuk do të kishin pse të mendonin edhe për një interpelancë, për të cilën duhet të presin të vërtetën e radhës në gjuhën belge, e helbete një ditë do t’ju vijë radha ta dëgjojnë Kryeministrin e tyre nëse vëllai i tij ka trafikuar kokainë dhe ai dora vetë, Edvin Kristaq Rama, ka pastruar para të trafikut të drogës!
Gjithsesi, ti heqim fillimisht vizën akuzës që me ngulmim e bënë Edi Rama, duke mos dëgjuar këshillën e Gjyshes, për xhahilët, çingijet e ahengxhinjtë që vazhdojnë tallavanë e tyre me dollitë e gëzimit për denigrimin e Shqipërisë, dhe si njerëz pa atdhe që janë, punojnë për çdo të huaj që me qëllim apo nga padija janë gati ta denigrojnë Shqipërinë, duke nxjerrë në mexhlise jashtë kufijve tanë plehrat e shtëpisë së këtyre këtu!
Nëse ka të tillë dhe janë xhahilë, çingije e ahengxhinjë, çfarë është Edi Rama kur si Kryetar i Partisë Socialiste në opozitë, i niste email eurodeputetes Tanja Fajon e ajo e lexonte në PE, se në Shqipërinë e drejtuar nga Kryeministri Sali Berisha, eksponentë të tij i kishin heq fëmijën, gruas shtatzanë të Kryetarit të Bashkisë Kavajë, vetëm pse ishte opozitë e Saliut!
Pra, Edi Rama e ka më mirë të heshtë, se ende ka dikush që edhe i troket në derën e qeverisë së tij të qelbur nga korrupsioni, me të vërtetën që është një dhe vetëm një!
Për të vazhduar me ato që raporton RAI 3 dhe Kryemistri Edi Rama na lodhi për një javë të tërë pavarësisht se Gjyshja i kishte thënë se të gabosh është njerëzore, por të ngulmosh është djallëzore!
Askush përveç Edi Ramës nuk tha se kërthiza e dokumentarit të transmetuar në RAI 3 është nëse është përgjigjur ose jo, Sekretari i Përgjithshëm i Kryeministrisë, Engjëll Agaçi, madje as ai vetë në reagimin e tij!
Nuk ka nevojë të ngulmojë Edi Rama në arsyetimet e tij jo vetëm për hir të Gjyshes, se çfarë tha taljoni dhe sa qelibar është Engjëll Agaçi me gjithë atë lukuni mediash dhe gazetarësh injorantë, që duan të na bindin se pse një avokat që ka mbrojtur kriminelë e trafikant droge nuk mund të jetë një ditë edhe Sekretar i Përgjithshëm i Këshillit të Ministrave të një vendi!
Duke transmetuar nga mëngjesi deri në darkë, kronika e deklarata në të gjitha televizionet kombëtare, nuk mund t’ju mbushësh mendjen shqiptarëve duke ngulmuar me tërheqjen e paraleles idiote nga frankofonia me François Mitterrand, kur ka shqiptarë që edhe lexojnë dhe e dinë se Mitterand ka studiuar shkenca politike!
Dhe, nëse vërtetë duhet ndonjë tërheqje paraleleje dhe shpërfillje të Gjyshes, pse kjo tufë idiotësh që e quajnë veten “analistë” nuk na japin një shembull të një juristi të Hitlerit që ka shërbyer pas luftës së dytë botërore në insititucionet gjermane; Ose, mjekët që merren si shembull nga kjo bandë mediatike! Njohin këta mjekë që ishin në shërbim të Hitlerit dhe bashkëpunëtorëve të tij, ose largëqoftë atyre që kanë punuar nëpër kampe përqëndrimi, që kanë punuar mjekë edhe me mbarimin e luftës!
Dhe, kur që të gjitha televizionet e licencuara kombëtare konsumojnë aq shumë energji për të na dëshmuar se sa qelibar na qenka Engjëll Agaçi, si është e mundur që për një javë askush nuk u interesua për 30 hektarët e falur për shefin e Interpolit në Tiranë nga një trafikantë droge; Apo, këta nuk janë xhahilë, çingije e ahengxhinjë dhe nuk e kruajnë kot dregëzën e krimit nga e cila mund të përmbytemi në gjak!
Kur i sugjeron taljonit Këshillën e Gjyshes, pse nuk i bindet vetë! Ku i dihet, ndoshta Olsi Rama ka gabuar dhe e ka shfrytëzuar makinën e njëjtë që përdornin trafikantët e drogës nga laboratori i Xibrakës, dhe këtë nuk e ka thënë vetëm RAI 3! Nëse Gazment Bardhi ka dëshmi nga TIMS se Olsi Rama e ka përdor këtë makinë, pse Edi Rama ngulmon që këtë opozita e bënë për inat sepse Bardhi nuk është rasti i vetëm në Ballkan që si opozitar furnizohet me dëshmi kundër shefave të qeverive përkatëse!
Edi Rama ngatërron kot dhe akuzat e RAI 3 se bëhen kundër Shqipërisë, pavarësisht qëllimit të tyre, planit të Kryeministres Meloni për refugjatët dhe zgjedhjeve evropiane.
Kryeministri i Shqipërisë thotë se gazetarët e RAI 3 cenuan dinjitetin e vendit dhe institucioneve tona, duke censuruar komplet fjalët e të akuzuarve pa asnjë provë e asnjë fre! Dhe, ndërsa vëren se gazetarët italianë flasin në një media të njëanshme shqiptare ndërkohë ka një shqetësim serioz se kush do të flasë në emër të së drejtës elementare të çdo shqiptari, për të mos u denigruar publikisht nëpër botë pa i dhënë as mundësinë të mbrohet?!
Kjo është pyetja që Edi Rama nuk jep përgjigje sepse televizionet kombëtare në Shqipëri përveç se me pronarë oligarkë, janë asqerë të Edi Ramës që vazhdojnë të denigrojnë nëpër botë të gjithë ata shqiptarë që nuk mendojnë si Kryeministri Rama!
Sa për të drejtën elementare që fletë Kryeministri, shqiptarët kishin rastin ta shohin si te Sali Berisha ashtu dhe te partia që e drejton; Dhe, xhahilët, çingijet dhe ahengxhinjtë komunistë heshtën edhe kur KQZ i emëroi Partisë Demokratike, Nënkryetarin Kryetar, me vendim të formës së prerë!
Pra, thjeshtë, shqiptarët nuk janë me fat me Kryeministrin që kanë jo vetëm pse akuzon taljonin, dhe nuk sqaron akuzat ku figuron emri i tij dhe të paktën vëllait, por, Edi Rama shpërfill dhe Gjyshen ndonëse e citon!
“Pavarësisht se sa të gjatë e keni gjyshen, ju duhet të rriteni vetë!” thonë irlandezët ndërsa shqiptarët e shohin Kryeministrin e tyre që nuk po rritet as në politikë ndonëse që 26 vjet e shohin në poste të rëndësishme shtetërore, firmos fap e fap, dhe nuk merr përgjegjësi!
Në fund, sa i përket interpelancës, shqiptarët nuk duhet të zemërohen pse Edi Rama e refuzon, sepse në rastin edhe më të keq mund ta nxirrte sërish atë Të dërguarën e posaçme që ka në Shkodër, për të lexuar ca thënie të Gjyshes së Skënderbeut të saj, si përgjigje të interpelancës, që as dreqi, as biri as shpirti i shenjtë nuk do ti kuptonte, e shqiptarët me sy të zgurdulluar vetëm mund ta kujtonin Ellen DeGeneres me thënien e saj epike:
“Gjyshja ime filloi të ecë 5 milje në ditë kur ishte 60 vjeç. Tani është 97 vjeçe dhe nuk e di se ku është!”
