Golat e Xhakës dhe Shaqirit/ BBC: Festime të çmendura dhe emocionale…
Me fitoren e djeshme kundër Serbisë, Zvicra ka bërë një hap të madh përpara drejt kalimit të fazës së grupeve, në Kupën e Botës “Rusia 2018”.
Golin e fitores për helvetikët e realizoi, Xherdan Shaqiri, lojtari i Stoke City-t, i cili pritet të kalojë në rradhët e Liverpool sezonin tjetër.
Fitorja e Zvicrës ka tërhequr vëmendjen e mediave botërore, përfshi këtu edhe BBC, e cila ka përshkruar edhe mënyrën e festimit të dy lojtarëve shqiptarë, Granit Xhaka dhe Xherdan Shaqiri, pas shënimit të golave.
Granit Xhaka shënoi një gol të bukur duke barazuar rezultatin për Zvicrën pasi Aleksandar Mitrovic e vuri Serbinë në avantazh në minutën e pestë.
Serbia, e cila kishte një kërkesë të fortë për një penallti, dominoi në pjesën e parë, duke ditur se një fitore do të kishte konfirmuar vendin e tyre në etapat e eliminimit.
Zvicra tani është në të njëjtin nivel pikësh me Brazilin, 4 secili, duke kryesuar Grupin E, por për shkak të golavarazhit amerikano-latinët renditen të parët.
Renditja dhe fituesit e Grupi E do të dihen të mërkurën më 27 qershor në orën 19:00 kur Brazili luan kundër Serbisë dhe Zvicra përballë Kosta Rikës.
Ata do të kualifikohen për në të 16-at me një barazim kundër Kosta Rikës, e cila tashmë është eliminuar, në ndeshjen e tyre përfundimtare.
Nëse Zvicra fiton, Serbia duhet të mundë Brazilin në ndeshjen e fundit për të përparuar.
BBC shkruan se si Granit Xhaka arriti të përfitojë në minutën e 52-të për të barazuar rezultatin.
Ndërsa, Xherdan Shaqiri ishte me shumë ndikim në pjesën e dytë, duke përfituar nga mbrojtja e dobët e Serbisë, e duke shënuar golin e fitores.
Kurse, për festimin e Xhakës dhe Shaqirit, BBC e ka quajtur të “çmendur” dhe shumë “emocional”, për shkak se të dy futbollistët janë me prejardhje nga Kosova.
Sipas BBC-së, babai i Xhakës kaloi tre vjet e gjysmë si një i burgosur politik në Jugosllavi, ndërsa Shaqiri lindi në Jugosllavi para se të emigronte në Zvicër si fëmijë.
Që të dy festuan me shqiponjë, simbol ky për flamurin shqiptar.
Shaqiri gjithashtu kishte me vete një flamur të Kosovës, të ngjitur në këpucët e tij dhe u sulmua nga tifozët e Serbisë kur emri i tij u përmend para fillimit të ndeshjes.
I pyetur për festimet e lojtarëve të tij, menaxheri i Zvicrës Vladimir Petkoviç, tha: “Ju kurrë nuk duhet të përzieni futbollin dhe politikën, është e rëndësishme të jeni një tifoz dhe të jepni respekt. Ishte një atmosferë e mrekullueshme dhe kjo duhet të mbështetetet”.
