Grabitja në Aeroportin e Rinasit/ Ish-Gjeneral Lleshaj: Banda mori goditje shkatërruese; Dhe, disa miliona euro…

Një dië pas grabitjes së turpshme në Aeroportin e Rinasit, Ministri i Brendshëm, Ish-Gjeneral Sandër Lleshaj, ka fajësuar koncesionarin i cili, sipas tij, nuk ka sinjalizuar në kohë Policinë e Shtetit për të bërë të mundur ndalimin e grabitjes së sasisë së konsiderueshme të parave.

Por Ish-Gjeneral Lleshaj si gjithmonë edhe sot foli për një punë të mirë të policisë që drejton, duke u ngushëlluar me faktin se banda ka marrë goditje shkatërruese nga humbja e njërit prej anëtarëve të bandës kriminale, por duke harruar se kjo bandë mori me vete disa miliona euro; Për shumën e eurove që vazhdon të mbetet mister dhe heshtin, Aeroporti, Kompania ajrore që do të transportonte këto para, Policia e Shtetit dhe së fundi edhe Gjeneral Sandër Ljeshaj, i cili vazhdon që mos ta ketë të qartë se policia shërben për parandalimin e vjedhjeve dhe jo vrasjen e banditëve.

Ish-Gjeneral Lleshaj që në fillim e gjeti fajtorin, koncesionari:

“Ngjarja e ndodhur dje, më datë 09.04.2019, gjatë të cilës u cenua rëndë siguria e Aeroportit të Rinasit, u grabit një sasi vlerash monetare dhe u vu në rrezik serioz jeta e forcave të rendit, po hetohet me intensitet të lartë nga Prokuroria dhe Policia e Shtetit. Nga analiza e deritanishme, rezulton se nuk kanë funksionuar aspak mekanizmat e sigurisë që janë nën përgjegjësinë e kompanisë koncensionare të Aeroportit,” tha ministri i Brendshëm duke folur pas vjedhjes së miliona eurove, për sigurinë të cilën të gjithë e kanë kritikuar mbi ose nën zë:

“Kompania kineze që ka koncesionin e aeroportit të Rinasit ka dështuar të përmbushë përgjegjësitë e saj për garantimin e parametrave të sigurisë fizike. Koncesionari dhe kontraktori i zgjedhur prej tij, që përgjigjet për sigurinë fizike të Aeroportit, nuk kanë arritur të zbatojnë standardet e detyrueshme të sigurisë, që përcaktohen nga legjislacioni vendas dhe nga Organizata Botërore e Aviacionit Civil, ICAO, megjithëse vetëm për llogari të sigurisë kanë arkëtuar rregullisht dhe pa ndërprerje 3 euro për çdo pasagjer që ka dalë nga ky Aeroport.”

Por ja sa e lehtë do të ishte sikur përveç koncesionarit do të kishin reaguar, ai dhe vartësit e tij:

“Do të kishte mjaftuar edhe vetëm një pjesë e këtyre parave të përvitshme, që pasagjerët paguajnë ekskluzivisht për sigurinë, për ta garantuar në mënyrë të shumëfishtë perimetrin e jashtëm të Aeroportit, i cili dje jo vetëm që është hapur për disa sekonda, por, për më keq, Koncesionari dhe Kontraktori i tij për sigurinë nuk kanë arritur madje as të sinjalizojnë policinë për këtë thyerje të patolerueshme të sigurisë.

Koncesionari jo vetëm që ka refuzuar zbatimin e kërkesave të shumta dhe të herëpashershme të Policisë së Shtetit për marrjen e masave në drejtim të sigurisë fizike, por në shumë raste as nuk ka denjuar të kthejë qoftë edhe përgjigjet formale për korrespondencën përsëritur zyrtare,” tha Ish-Gjeneral Sandër Lleshaj por çuditë sepse kur banorët e Bregut të Lumit refuzojnë, marrin gaz lotsjellës dhe dru, ndërkohë po këta policë konsecionarit i lejojnë që të mundësoj vjedhjen e miliona eurove dhe askush nuk merr përgjegjësi edhe kur ai refuzon .

“Të nisur nga incidenti i rëndë i ditës së djeshme dhe në vlerësim të të gjithë marrëdhënies së vështirë me shoqërinë Koncesionare, që është zhvilluar pas ngjarjes së datës 30.06.2016, kur siguria e Aeroportit u cenua në mënyrë të ngjashme me ditën e djeshme, Autoritetet shtetërore shqiptare do të marrin masa ligjore të shpejta dhe të forta për të garantuar pa asnjë mëdyshje të gjitha parametrat dhe standardet e nevojshme të sigurisë në Aeroportin e Rinasit. Siguria e jetës, ajo e pronës dhe siguria kombëtare prevalojnë mbi të gjitha interesat e tjerë. Të gjitha masat që do të merren do të jenë plotësisht në funksion të garantimit të sigurisë kombëtare, të jetës e të pronës,” tha Ish-Gjeneral Sandër Lleshaj, gjëra që i din çdo qytetar i Shqipërisë, si ata te Bregu i Lumit ashtu edhe banditët që morën miliona euro por që ishin në dijeni edhe se kemi të bëjmë me një ministër dhe polici të paaftë. .

“Me masat e reja që do të merren do të garantohet një nivel sigurie i ri, shumë herë më i lartë dhe në përputhje të plotë me standardet më të mira ndërkombëtare,” tha ministri i Brendshëm duke harruar se kemi të bëjmë me një grabitje të përsëritur me po këtë Polici të Shtetit, për punën e së cilës, në atë kohë Sandër Lleshaj këshillonte Kryeministrin.

Por ai nuk u mjaftua me kaq, gjatë prezantimit të këtij dështimi të turpshëm ku fajin e gjeti ndër kinez:

“Sa i përket dinamikës së ngjarjes më duhet të them se reagimi i shpejtë, profesional, i përpjesshëm dhe i vendosur i Policisë së Shtetit ka sjellë si rezultat që autorët e këtij sulmi të rëndë të lënë në dorë të ekipeve të hetimit prova të shumta materiale, të cilat po i nënshtrohen procedurave përkatëse.

Falë këtij reagimi të shpejtë dhe të fortë të Policisë së Shtetit, besohet se banda kriminale, e cila ka arritur që edhe më parë të godasë transportin e vlerave monetare, drejt Rinasit apo në institucione të tjera bankare të vendit, pas humbjes së djeshme të kreut të saj, ka marrë një goditje shkatërruese, e cila po thellohet nga ora në orë, falë punës plot përkushtim që po bëhet nga Prokuroria dhe Policia e Shtetit,” tha Ish-Gjeneral Lleshaj duke ngatërruar vrasjen e një banditi me shkatërimin e një bande të tërë:

“Shkatërrimi i këtij grupi shumë të rrezikshëm kriminal është një sinjal tjetër i rëndësishëm ndaj botës së krimit të organizuar në tërësi. Policia e Shtetit dhe gjitha organet ligj zbatuese të vendit janë të angazhuara, të gatshme, të përgatitura dhe shumë të motivuara për të neutralizuar çdo tentativë kriminale që cenon sigurinë e jetës apo të pronës,” tha ministri i Brendshëm për tu kthyer “gju më gju me popullin” i cili është i pasigurtë pikërisht nga mosdija dhe paaftësia e ministrit:

“Më lejoni që falënderoj bashkëpunimin e shumë qytetarëve, të cilët dëshmojnë kështu nivelin e lartë të përgjegjësisë civile si dhe mbështetjen që i japin sigurisë së tyre përmes besimit tek Policia e Shtetit.”

Dhe për të mos u mjaftuar me fajtorë kinezë, Ish-Gjeneral Sandër Lleshaj kishte gjetur edhe ca element të brendshëm, që morën guximin ti thonë Ish-Gjeneralit se sa i paaftë që është, por ai vazhdon sot me akuzat:

“Në të njëjtën kohë dua të shpreh keqardhjen e thellë për segmente të caktuara të politikës destruktive, që edhe në momentet kur Policia e Shtetit ishte në zhvillim të një përpjekjeje të rrezikshme dhe të armatosur me grupin kriminal, nxituan të rreshtohen kundër saj, të akuzojnë në mënyrë të përçartur dhe krejt të pabazuar atë, si dhe të përhapnin tymin e të pavërtetës, në një kohë kur pritej përkrahja e çdo qytetari apo grupi politik që ndjen përgjegjësinë normale ndaj sigurisë dhe rendit publik të Shqipërisë,” tha ministri kur dëshmi janë disa miliona euro të vjedhur në zonën që duhet të jetë më e sigurta në Shqipëri ndërsa përgjegjësinë për
sigurinë dhe rendin publik të Shqipërisë nuk e ka populli dhe segmente të caktuara të tij por Ministria e Brendshme që ai drejton, ndryshe nuk do të ekzistonte fare Policia e Shtetit me të cilën ai mburret çdo sekondë.

Dhe në fund, Ish-Gjenerak Sandër LLeshaj siguroj qytetarët dhe gjithë operatorët që përdorin Aeroportin e Rinasit që me masat emergjente të marra dhe të tjera që janë në proces, siguria në këtë Aeroport është plotësisht e garantuar, siguri për të cilën qytetarët e dinin që ekziston edhe pas grabitjes së turpshme të vitit 2016.