Gratë përpara, burrat prapa/ Rama vijon shoë dhe talljet me qytetarët

Kryeministri Edi Rama ka zhvendosur turin e llogaridhënies publike në Sarandë, ndërsa ishte i pranishëm në Karahaxh, ku ka bërë sikur ka dëgjuar problemet e paraqitura.

Për çdo ankesë që iu bë, Kryeministri ka ripërsëritur frazën: ju mjaftojnë 3 minuta për t’a çuar përmes portalit “Shqipëria që duam” dhe 10 ditë kohë për të marrë përgjigjen.

Takimi i Ramës ka nisur me një batutë të tij, ku ka zgjedhur të përdorë shprehjen “gratë të parat”, që do të thotë se pyetjet dhe shqetësimet duhej të shpreheshin nga gratë dhe pasi ato të përfundonin do të kishin të drejtë edhe burrat.

“Juve nuk jeni gra teksa iu shoh nga larg… po s’ja u jap fjalën se s’je grua, ca të them unë”, iu drejtohet Rama, njërit prej të pranishmëve.

“Mos u mërzisni se s’po iki, do t’iu vijë radha”, iu drejtohet Rama të tjerëve që kërkonin fjalën.
Më tej, e merr fjalën një tjetër zonjë e cila i thotë Kryeministrit se në Shqipëri voton për Partinë Komuniste, ndërsa në Greqi për “Syrizën”.

Ajo i shpreh një problem që ka me pronën, ndërsa Rama i këshillon ta drejtojë ankesën e saj në portalin “Shqipërisë që duam”. Fjalën e tij e mbyll me një batutë: Ti voton për partinë komuniste jo për mua!