Greminger në PD/ Fund krizës, Basha: Dialogu, me ndihmën e OSBE!
Pas takimit me Sekretarin e Përgjithshëm të OSBE, Thomas Greminger, Kryetari i Partisë Demokratike, Lulzim Basha, tha se opozita është e qartë dhe kërkon miratimin e një reforme zgjedhore që garanton lirinë e votës dhe menjëherë zgjedhje të parakohshme ndërkohë është diskutuar roli që OSBE mund të luajë për të ndihmuar në dialogun politik për t’i dhënë fund krizës politike.
“Opozita është e vendosur të japë kontributin e saj për një reformë të vërtetë zgjedhore që të garantojë lirinë e votës. Për këtë nevojitet vullnet politik për të miratuar këtë reformë dhe më e rëndësishmja vullnet politik për të zbatuar këtë reformë. Kjo është arsyeja pse opozita, PD, Aleatët tanë, kanë vënë në dispozion të kësaj reforme shumë të rëndësishme për qytetarët, gjithë ekspertizën tonë që mund të them që është ekspertiza më e mirë në vend por nga ana tjetër duhet vullnet politik,” tha Lulzim Basha duke theksuar se ky vullnet deri më sot mungon nga pala tjetër, palë kjo e kapur në shkatërrimin e tre palë zgjedhjeve, siç tregojnë raportet e OSBE-ODIHR.
“Prandaj me Sekretarin e Përgjithshëm të OSBE kemi diskutuar për ndihmën që OSBE mund të japë në këtë drejtim, në veçanti në tre fusha kryesore, në rolin që ka OSBE për t’i kujtuar vendeve anëtare për standardet dhe kushtet që duhet të përmbushin sa i përket demokracisë dhe shtetit ligjor; Së dyti në ofrimin e ekspertizës të ekspertëve të OSBE-së për të ndihmuar në këtë proces; Dhe, së treti në rolin që OSBE mund të luajë për të ndihmuar në dialogun politik kaq shumë të nevojshëm dhe të kërkuar dhe nga BE dhe nga Gjermania për t’i dhënë fund krizës politike në vend.”
Për opozitën, tha lideri i saj Lulzim Basha, rruga është e qartë, është e njëjta rrugë që përshkruhet dhe nga kushtet e Bundestagut:
“Miratimi i reformës dhe zgjedhje të parakohshme parlamentare në një ditë me zgjedhjet kushtetuese vendore ku vota e shqiptarëve është e garantuar dhe vullneti i shqiptarëve nuk tjetërsohet nga grupet kriminale dhe nga një qeveri e paaftë dhe pa vullnet për të garantuar zgjedhje të lira dhe të ndershme siç është qeveria dhe kryeministri aktual.”
