Grenell i kërkon Qeverisë së re të Kosovës të heqë taksën

I dërguari i Presidentit Trump për dialogun Kosovë-Serbi, Richard Grenell, i bëri thirrje Qeverisë së re të Kosovës që të heqë taksën ndaj mallrave të importuara nga Serbia.

Richard Grenell, i cili është dhe Ambasador i Shteteve të Bashkuara në Gjermani, tha se pret që taksa të hiqet menjëherë.

“Ua kemi bërë të qartë të gjithë udhëheqësve të partive (në Kosovë) se heqja e taksës është në interesin më të mirë të Kosovës dhe ekonomisë së këtij vendi,” tha Grenell për Agjencinë e lajmeve Associated Press.

Në fund të vitit 2018, Qeveria e atëhershme e Kosovës, me në krye Ramush Haradinajn, ka vendos taksën 100% importeve nga Serbia dhe Bosnje e Hercegovina, raporton RFE.

Kjo ka bërë që të ndërpritet dialogu për normalizimin e marrëdhënieve midis Kosovës dhe Serbisë.

Presidenti i Serbisë, Aleksandar Vuçiç, është zotuar se nuk do të rikthehet në dialog pa u hequr taksa.

Kjo masë nuk është hequr edhe përkundër thirrjeve të komunitetit ndërkombëtar për ta bërë një gjë të tillë.

Kryeministri i ri i Kosovës, Albin Kurti, i cili është zgjedhur dje në këtë detyrë, tha se është i gatshëm për vazhdimin e dialogut me Serbinë dhe ka paralajmëruar formimin e një ekipi gjithëpërfshirës për këtë proces; Si dhe është i gatshëm të ndërmarrë masa reciproke tregtare, ekonomike dhe politike ndaj Serbisë.