Grenell me Thaçin dhe Kurtin/ Marrëveshja Kosovë-Serbi, pengesa kryesore e investimeve të huaja
Përfaqësuesi i Posaçëm i Presidentit të SHBA-së, Donald Trump, Richard A.Grenell, për bisedimet Kosovë-Serbi sot ka zhvilluar takimin e tij të parë me liderët e Kosovës, Presidentin Hashim Thaçi dhe Kryeministrin e ardhshëm Albin Kurti për të vazhduar më pas me vizitën në Beograd.
Në takim me Presidentin e Kosovës, Hashim Thaçi, Ambasadorin Richard Grenell, ka shfaqur shpresën se Kosova dhe Serbia do të takohen së shpejti dhe do të gjejnë një zgjidhje, dhe sipas tij një marrëveshje ndërmjet dy shteteve do të vërë themelin për rritje ekonomike dhe do t’i kontribuojë mirëqenies së gjithë qytetarëve.
Ndërsa Presidenti Thaçi duke falënderuar Ambasadorin Grenell për mbështetjen që Shtetet e Bashkuara i kanë dhënë Kosovës në të gjitha periudhat dhe pjesëmarrja aktive e SHBA në gjetjen e një zgjidhjeje përfundimtare ndërmjet Kosovës dhe Serbisë do të jetë përcaktuese.
“Që nga viti 2008, nuk ka pasur kaq vëmendje të SHBA-së për Kosovën. Kjo shton konfidencën dhe besimin tonë në kërkimin e marrëveshjes së paqes me Serbinë,” tha Hashim Thaçi duke premtuar se Kosova do të jetë konstruktive në gjetjen e një zgjedhjeje, e cila do t’i hapë rrugë zhvillimit.
Pas takimit, Ambasadori amerikan në Kosovë, Philip Kosnett, tha se Ambasadori, Richard Grenell pret me padurim që të punojë me liderët e Kosovës për të ndihmuar në arritjen e paqes, drejtësisë dhe prosperitetit në Kosovë dhe rajon.
“I dërguari i posaçëm presidencial, Grenell pret me padurim që të punojë me presidentin Thaçi dhe liderët e tjerë të Kosovës, për të ndihmuar që të arrihet paqja, drejtësia dhe prosperiteti në Kosovë dhe rajon,” tha përmes rrjetit social Twitter, Ambasadori Philip Kosnett.
Richard A.Grenell takon Albin Kurtin
Ndërsa me Kryetarin e Lëvizjes Vetëvendosje dhe Kryeministrin e ardhshëm të Kosovës, Albin Kurti, Përfaqësuesi i Posaçëm i Presidentit të SHBA-së, Donald Trump, Richard A.Grenell, për bisedimet Kosovë-Serbi zhvilloi një takim në Ambasadën e SHBA në Prishtinë,
Ambasadori Grenell fillimisht uroi udhëheqësit e Vetëvendosje për vendin e parë në zgjedhjet parlamentare të së dieles së 6 tetorit dhe dëshironte të dëgjonte mendimin e qëndrimin e tyre për mundësitë e një marrëveshje me Serbinë, para se ai të udhëtonte për Beograd. Grenell theksoi që mungesa e marrëveshjes së Kosovës me Serbinë është pengesa kryesore e investimeve të huaja në ekonominë kosovare.
Albin Kurti duke shprehur falënderiminn e tij për rolin dhe mbështetjen e Shteteve të Bashkuara për Kosovën, si në luftë ashtu në paqe, dhe gatishmërinë e tij që si kryeministër i ri i Kosovës të thellojë bashkëpunimin me SHBA, ai u pajtua me Ambasadorin Grenell që Kosova ka nevojë për zhvillim ekonomik dhe investime prej jashtë, por për këtë gjë problem janë sidomos korrupsioni i lartë në qeveri që krijon pasiguri e cila tremb bizneset, varfëria e përhapur në popullsi që e mban të ulët kërkesën agregate si dhe qasja e vështirë në financa për bizneset për shkak të kamatave të larta të kredive në banka. Sa i përket dialogut me Serbinë, Albin Kurti tha që përmbajtja dhe procesi i marrëveshjes janë më të rëndësishme për qëndrueshmërinë e saj sesa afati kohor për të.
Në fund të këtij takimi, bashkëbiseduesit u pajtuan që sa më shpejtë të krijohet qeveria e re në Kosovë dhe se do të vazhdojnë komunikimin e shpeshtë e të rregullt.
