Grenell pret ricaktimin e shpejtë të takimit Kosovë-Serbi

I dërguari i Predsidentit Trump për dialogun Kosovë-Serbi, Richard Grenell, tha se pret që takimi midis dy palëve të ricaktohet së shpejti.

Takimi i paraparë për datën 27 qershor në Washington është anualuar, pasi Zyra e Prokurorit Special në Hagë bëri pblike dje aktakuzën për krime lufte kundër presidentit të Kosovës, Hashim Thaçi.

Ky i fundit anuloi pjesëmarrjen në takim, e më pas edhe kryeministri i Kosovës, Avdullah Hoti, e ka bërë një hap të tillë.

“Faleminderit kryeministër Hoti. E kuptoj vendimin tuaj dhe ne presim që ta ricaktojmë takimin së shpejti,” tha Richard Grenell përmes rrjetit social Twitter.

Takimi në Shtëpinë e Bardhë është parë si rinisje e dialogut për normalizimin e marrëdhënieve midis Kosovës dhe Serbisë, i cili është ndërprerë qysh në fund të vitit 2018, pasi Kosova vuri taksë 100 për qind mallrave të importuara nga Serbia, për shkak të fushatës së saj kundër pavarësisë së Kosovës.

Taksën që e ka vënë Qeveria e Ramush Haradinajt e ka zëvendësuar më 1 prill me masa reciproke tregtare ish-kryeministri i Kosovës, Albin Kurti.

Shtetet e Bashkuara kanë qenë kundër masave ndaj Serbisë, duke thënë se ato e pengojnë dialogun midis palëve.

Me largimin e Kurtit dhe ardhjen e kryeministrit të ri të Kosovës, Avdullah Hoti, Serbisë i janë hequr të gjitha pengesat tregtare.