Greqia “blenë” mediat shqiptare/ Reagimi, Idrizi: Jemi në emergjencë kombëtare, Presidenti të mbledhë Këshillin e Sigurisë

Një ditë pasi mediat greke informuan se ministria e Jashtme greke kishte financuar mediat shqiptare dhe maqedonase me Fond Sekrete, kryetar i PDIU, Shpëtim Idrizi reagon duke e konsideruar se vendi është në emergjencë kombëtare ndërsa i bëri thirrje Presidentit Meta të mbledhë Këshillin e Sigurisë Kombëtare.

“Sot jemi në një emergjencë kombëtare e akuza të rënda për tradhëti kombëtare. Në këto kushte i kërkojmë presidentit të mbledhë urgjentisht Këshillin e Sigurisë Kombëtare të vërë në lëvizje të gjithë agjencitë ligjzbatuese për të hetuar e vënë prapa dyerve të qelisë ata që kanë marra para, sepse vetëm në një muaj janë dhënë mbi 1 milionë euro, por në shumë vite sa është kjo shumë,” tha Shpëtim Idrizi duke kërkuar urgjentisht:

“I kërkojmë urgjentisht Prokurorisë së Përgjithshme të hetojë portalet, gazetat , televizionet, biznesmenët, OJQ-të që janë financuar nga fondet e zeza sekrete, të ministrisë së Jashtme greke, të ministrisë së Mbrojtjes  dhe të shërbimeve sekrete greke. Ku janë investuar? Me  çfarë çmimesh? Cilët janë qëndrimet e mbajtura nga këto media? Cilët persona janë të implikuar personalisht në këtë operacion?”

Ndërkohë Prokuroria e Athinës ka urdhëruar fillimin e hetimeve pas publikimit se Fonde Sekrete të ministrisë së Jashtme janë përdorur për të financuar media në Shqipëri dhe Maqedoni.