Greva e minatorëve në 1989, sakrifica që bëri historinë

Në Stantërg u shënua 37 vjetori i ngujimit të 1.350 minatorëve, një nga ngjarjet më të rëndësishme kundër suprimimit të autonomisë së Kosovës nga regjimi serb. Në manifestimin qendror të “Javës së Minatorëve”, drejtuesit e ndërmarrjes paralajmëruan reforma për ta bërë Trepçën një ndërmarrje më të qëndrueshme.

Greva, e nisur më 20 shkurt 1989 si kundërshtim ndaj shfuqizimit të autonomisë së Kosovës nga regjimi i atëhershëm serb, u shndërrua në simbol të qëndresës, unitetit dhe dinjitetit qytetar.

“Jo rrallë, në historinë botërore kemi ngjarje kaq të madhe sa edhe greva e shkurtit të vitit 1989. Qysh në atë kohë udhëheqësit e vendeve demokratike të Evropës, miqtë tanë e kanë thënë qartë që minatorët e Trepçës po i mbrojnë themelet e demokracisë edhe të drejtën e popullit të Kosovës me zgjedh vet udhëheqjen e vet,” tha Zv/Ministri i MINT, Getoar Mjeku.

“Ju përshëndes për Ditën e Minatorit, e cila në historinë më të re të Kosovës e ka të shënuar me shkronja të arit lavdinë dhe kontributin patriotik për Kosovën dhe për çështjen shqiptare në përgjithësi,” tha Kryetari i komunës së Mitrovicës, Faton Peci.

Kryeshefi ekzekutiv i Trepçës, Faton Ahmeti, u ndal edhe te performanca financiare e ndërmarrjes, duke bërë të ditur se gjatë vitit 2025 është realizuar një qarkullim prej afro 13 milionë eurosh, gati dyfish më i lartë krahasuar me vitin 2024.

“Kemi realizuar një qarkullim afro 13 milionë euro. Realisht kemi dyfishuar qarkullimin në krahasim me vitin 2024. Kemi krijuar të hyra 2 herë më shumë sesa në vitin 2024,” tha Faton Ahmeti për vitin 2025 kur Stantërgu tejkaloi planin në eksploatimin e xehes me 105 për qind, në prodhimin e koncentratit të plumbit me 115 për qind, duke realizuar plotësisht edhe planin në prodhimin e zinkut.

Ndërsa Presidentja e Kosovës, Vjosa Osmani, tha në këtë përvjetor se sakrifica e minatorëve u kthye në kushtrim lirie dhe dëshmoi se rruga drejt lirisë hapet nga guximi i atyre që nuk dorëzohen.

“Sot kujtojmë grevën historike të urisë të minatorëve të Trepçës, të nisur më 20 shkurt 1989 nga rreth 1.350 minatorë, të cilët u ngritën kundër politikave shtypëse të regjimit hegjemonist serb.

Të barrikaduar në thellësitë e minierës së Stan Tërgut për tetë ditë radhazi, ata u shndërruan në simbol të guximit dhe dinjitetit. Me rezistencën e tyre, minatorët krijuan solidaritet e unitet popullor në mbarë Kosovën,” tha Presidentja e Kosovës në mesazhin e saj përmes rrjetit social Facebook duke përfunduar:

“Sakrifica e tyre dridhi themelet e një pushteti që promovonte diferencim e pabarazi.

Sakrifica e tyre u kthye në kushtrim lirie dhe dëshmoi se rruga drejt lirisë hapet nga guximi i atyre që nuk dorëzohen.”