Grupe kriminale serbe, Sveçla: Zbulohet sasi e madhe armatimi në veri të Kosovës

Ministri i Punëve të Brendshme të Kosovës, Xhelal Sveçla, tha sot se për 2 dekada, veriu i Kosovës ka jetuar në ilegalitet, në një rend anormal, ku kanë gjetur strehë organizatat kriminale e kriminelët e financuar nga Beogradi.

Përmes një postimi në rrjetin social Facebook, Sveçla thekson se hyrja ilegalisht e mallrave e armëve në Kosovë ka prodhuar situatë shqetësuese edhe për qytetarët tanë në veri, të cilët të përballur me fuqinë e kriminelëve kanë jetuar nën shantazh e presion të vazhdueshëm.

“Si Qeveri, gjatë 2 viteve të fundit, kemi zbuluar e bllokuar rrugët ilegale të kontrabandimit. Ditën e sotme, Policia e Kosovës së bashku me institucionet e inteligjencës, pas identifikimit, ka zhvilluar bastisje në një bazë të armatimit në veriun e Kosovës, konkretisht në Zveçan. Kjo shtëpi është përdorur për grumbullim dhe shpërndarje të armatimit për grupet kriminale serbe,” shprehet Xhelal Sveçla duke shtuar se deri më tani është zbuluar një sasi e madhe e armatimit, duke përfshirë armë automatike, fishekë, granata dore dhe eksploziv.

“Në vendin e ngjarjes, përveç institucioneve të sigurisë, kanë qenë të pranishëm edhe përfaqësues të KFOR-it,” shprehet i bindur se Veriu hap pas hapi po shkon drejt normalitetit dhe rendi e ligji nuk do të cënohet në asnjë cep të Republikës.