Grupet e punës LVV-LDK, Konjufca: S’ka përplasje! Lutfi Haziri ishte…

Lëvizja Vetëvendosje e bëri të qartë çështjen e postit të kryeministrit në qeverinë e ardhshme. Pas takimit i cili zgjati dy orë e gjysmë mes grupeve të punës, të Lëvizjes Vetëvendosje dhe Lidhjes Demokratike të Kosovës, Glauk Konjufca nga Lëvizja Vetëvendosje tha se i mandatuari për kryeministër do të jetë prej subjektit që ka fituar më së shumti vota.

“Sa i përket kryeministrit mendoj që kurrë nuk është kontestuar fakti… Prej atij momenti kur nuk është arritur marrëveshja, ne popullit ia kemi shpjeguar që tash kryeministri zgjidhet prej popullit. Tashmë është e qartë që faktikisht që mandatari për kryeministër do të jetë prej subjektit që ka fituar më së shumti vota”, tha Konjufca.

Ndërsa, për postet ministrore, Konjufca theksoi se ende nuk është caktuar një takim në të cilën do të diskutohet lidhur me këtë çështje, ndërsa sa i përket përplasjeve të fundit ndërmjet Lëvizjes Vetëvendosje dhe LDK, u shpreh se nuk kanë biseduar për këtë çështje.

“Të gjitha këto që kanë dalë janë forma të shprehjes, të cilat as nuk janë diskutuar në këtë takim. Në momentin që dy subjektet politike tona kanë thënë që numri i ministrive do të reduktohet prej 21 deri në 12, ne kemi diskutuar për masat që do të ndërmerren, dhe jo për emrat.”

Konjufca ka bërë të ditur se në takimin e sotëm të dyja grupet punuese kanë biseduar enkas për shëndetësinë dhe arsimin, teksa bëri të ditur se kanë caktuar takimin e ardhshëm ku do të flitet vetëm për politikat sociale.

“Mund të them që ka qenë një takim i cili është zhvilluar në një pajtueshmëri shumë të thellë të bashkëpunimit. Është një takim në të cilin kemi pasur pajtueshmërinë më të madhe. Diku për secilën fushë janë trajtuar së paku 10 tema thelbësore dhe në të cilat kemi gjetur pajtueshmëri të plotë. Mund të them që mospajtimet kanë qenë sa i përket çështjeve teknike dhe kohore se për sa kohë jemi në gjendje t’i realizojmë premtimet”, tha Konjufca ndërsa foli edhe për prezencën e shumëpërfolur të Lutfi Hazirit në takimin e pestë të grupeve të punës për harmonizimin e programeve qeverisëse.

“Jam i bindur, sepse isha pjesë e takimit, që kontributi i Lutfi Hazirit ka qenë shumë i nevojshëm në këtë takimin tonë, edhe për mbarëvajtjen e bisedimeve tona. Prandaj, ai i ka kontribuar kësaj atmosfere të mirë të arritjes së pajtueshmërisë tonë sa i përket këtyre dy fushave për të cilat folëm. Jo, ne sot folëm për arsimin dhe shëndetësinë, për këtë jemi mbledhur. Ne ende nuk e kemi caktuar një takim në të cilin do të flitet ndarja e dikastereve. Ne kemi konsideruar që shumë tema të politikës së jashtme dhe për disa projekte që janë madhore në Kosovë, si p.sh, projektet madhore në fushën e energjisë, e kështu me radhë, t’ua lëmë takimeve në nivelin më të lartë, ndoshta drejtpërdrejt me Mustafën dhe Albin Kurti,” tha Konjufca paralajmëroi se për 10 ditë do të përfundojnë negociatat për formimin e qeverisë së ardhshme.