Grupet e punës të LVV dhe LDK përmbyllin takimet, pritet Marrëveshja…

Grupet e punës të Lëvizjes Vetëvendosje dhe Lidhjes Demokratike të Kosovës për përafrimin e qëndrimeve mbi parimet e qeverisë së ardhshme, sot i kanë përmbyllur diskutimet.

Pas përfundimit të takimit të fundit, raporton RFE, Avdullah Hoti, nga Lidhja Demokratike e Kosovës, tha se tani u mbetet liderëve të partive që të konkretizojnë Marrëveshjen.

“Ky është takimi i fundit për pjesën programore të marrëveshjes. Kemi arritur t’i përmbyllim pothuajse të gjitha çështjet programore, prej zhvillimit ekonomik, arsimit, shëndetësisë, për politikat sociale, për kulturë, sport, për çështjet e diasporës, për çështjet energjetike,” tha Hoti duke shtuar se tani pritet Marrëveshja:

“Për sa na përket neve si grupe pune, në aspektin profesional kemi arritur t’i përmbyllim diskutimet tona dhe ne jemi të gatshëm që këtë marrëveshje, shumë shpjet, brenda dy-tre ditëve të ardhshme, në formë të shkruar ta dorëzojmë te kryetarët e partive, të cilët pastaj do të ulen – pas certifikimit të rezultateve (të zgjedhjeve të 6 tetorit) – për ta konkretizuar dhe për ta formalizuar këtë marrëveshje.”

Komisioni Qendror i Zgjedhjeve në Kosovë sot ka shpallur rezultatet përfundimtare të zgjedhjeve të parakohshme parlamentare, që janë mbajtur më 6 tetor. Lëvizja Vetëvendosje dhe Lidhja Demokratike e Kosovës janë dy partitë e para fituese që së bashku kanë shumicën me 61 ulëse parlamentare.