Grupi Parlamentar i PD, Bardhi: Komision i ri për Reformë Zgjedhore, zgjedhja Avokatit Popullit…
Duke i uruar suksese në emër të Grupit Parlamentar të Partisë Demokratike, kandidatit të opozitës për Bashkinë Kukës, Emri Vata, në garën e tij për kreun e bashkisë, Gazment Bardhi foli me përfundimin e mbledhjes edhe për vendimet e Grupit ndërsa sqaroi dhe procesin e zgjedhjes së Avokatit të Popullit, përshpejtimin e të cilit e kërkoi dhe SHBA e BE.
“Së pari dua që në emër të Grupit Parlamentar të PD-së t’i uroj suksese kandidatit të opozitës për bashkinë e Kukësit. Mesazhi që ne donim të përcillnim me mbledhjen e mbajtur sot në Kukës lidhet ekzaktësisht me faktin që kjo është një javë e rëndësishme për qytetarët e Kukësit. Ata duhet të zgjedhin që të bëjnë realisht ndryshimin në bashkinë e Kukësit duke i dhënë fund modelit që gjithë qytetarët e Kukësit dhe Shqipërisë dhe panë që ofronte Partia Socialiste për bashkinë e Kukësit.
Qytetarët e Kukësit kanë vetëm dy alternativa që të zgjedhin mes modelit të turpit Gjici ose modelin e opozitës. Rrugë të mesme në këto zgjedhje nuk ka, çdo opozitar që zgjedh të rri në shtëpi atë ditë do të thotë se është palë dhe mbështetës i regjimit të Ramës dhe modelit të Gjicit në bashkinë e Kukësit,” tha Gazment Bardhi duke vazhduar me vendimin që mori Grupi Parlamentar i PD për ngritjen dhe rikonceptimin e Komisionit të Reformës Zgjedhore në Parlament.
“Për ne, për Grupin Parlamentar të PD-së, është e papranueshme që në dy vjet, Komisioni i Reformës Zgjedhore nuk ka prodhuar asnjë rezultat. Lënia pa rezultat e Komisionit të Reformës Zgjedhore, në gjykimin tonë, ka favorizuar vijimin e manipulimit të zgjedhjeve nga regjimi i Edi Ramës.
Ne jemi ndalur në axhendën parlamentare të kësaj jave që vjen, të së enjtes,- tha Bardhi, – ku në fokus ka qënë reforma zgjedhore. Sot, Grupi Parlamentar i PD-së ka autorizuar kryetarin e Grupit që të propozojë projektvendimin për ngritjen e Komisionit të Reformës Zgjedhore dhe përbërjen e këtij komisioni, ku konkretisht, bashkëkryetar në emër të Grupit Parlamentar të PD-së është caktuar z. Oerd Bylykbashi, ndërkohë që anëtarë të këtij komisioni propozohen deputetët Dhurata Çupi, Dash Sula, Ervin Salianji, Tomorr Alizoti, Lindita Metaliaj, z. Shpëtim Idrizi, z. Fatmir Mediu dhe z. Petrit Vasili nga Partia e Lirisë.”
Me këtë rast, Gazment Bardhi, sqaroi kërkesën që ai i kishte drejtuar Kryetares së Parlamentit pas një shqetësimi të ngritur nga SHBA dhe BE, për çuarjen para të procesit të zgjedhjes së Avokatit të Popullit.
“Ajo që kam kërkuar unë për Avokatin e Popullit e popullin merr shkas nga një shqetësim që ka ardhur nga përfaqësues të SHBA dhe BE, të cilët kanë kërkuar në dijeninë time edhe nga Grupi Parlamentar i Partisë Socialiste, që të çojnë para procesin e zgjedhjes se avokatin e popullit.
Avokati ka disa detyra te rëndësishme në kuadër të zbatimit te reformës në drejtësi, dhe për këtë arsye përfaqësuesit e SHBA dhe BE, kanë shprehur shqetësimin. Në kuadër të këtij shqetësimi kam vënë në lëvizje këtë proces. Jam përgjigjur një shqetësimi që na ka ardhur nga aleatët strategjik.
Kam propozuar që ky proces të mos jetë një 17 maj tjetër, ku avokati zgjidhet duket ngrënë pica në një zyrë të Kuvendit, por një proces transparent. Nuk kam kërkuar të ulëm me Çuçin, por nga Kryetarja e Kuvendit, në cilësinë e saj si kreu i Parlamentit të ndërtoj një proces transparent mes palëve.
Procese zgjedhore të institucioneve kushtetuese duke ngrënë pica e dukë pirë cigare me Edi Ramën janë të pa papranueshëm për grupin parlamentar të opozitës.”
