Grupi Parlamentar i PD, Basha: Bëhuni zëri i qytetarëve, filloni konsultimet për reformën territoriale

Zbrisni në zonat tuaja dhe bëni publike shqetësimet e tyre, ishte porosia e Kryetarit të Partisë Demokratike, Lulzim Basha, para deputetëve në Grupin Parlamentar me mesazhin e qartë për tu bërë zëri i problemeve të qytetarëve, me të cilët duhet të fillojnë konsultimet për reformën teritoriale.

“Bëhuni zëri i problemeve të qytetarëve. Zbrisni në zonat tuaja dhe bëni publike shqetësimet e tyre. Rritja e çmimeve është skandaloze në kushtet e një varfërie që ka përfshirë shumicën dërrmuese të qytetarëve. Merrni informacion pranë prokurorive për ecurinë e hetimeve për masakrën zgjedhore të 25 prillit. Duhet bërë transparencë e procesit hetimor që po zvarritet me urdhra politik dhe ndjekur në çdo hallkë të gjyqsorit dhe jo vetëm. S’mund të pretendohet për drejtesi të pavarur përsa kohë nuk ndëshkon dhunuesit e procesit zgjedhor,” tha Lulzim Basha duke bërë me dije ngritjen e grupit të punës në Partinë Demokratike për të hartuar draftin ligjor dhe ngritjen e mekanizmave për të adresuar problemet e abuzimit me zgjedhjet dhe shitblerjen e votave.

“Së shpejti do të ngrihet grupi i punës në PD për të hartuar draftin ligjor. Duhet të bëjmë gati mekanizmat që të adresojmë problemet e abuzimit me zgjedhjet dhe shitblerjen e votës, si dhe reformë zgjedhore dhe instrumente zbatimi që mundësojnë rregulla të barabarta zgjedhore për të gjitha subjektet duke u bazuar në praktikat e mira europiane. S’mund të pretendohet për drejtesi të pavarur përsa kohë nuk ndëshkon dhunuesit e procesit zgjedhor,” mësohet të ketë thënë Kryetari i Partisë Demokratike, Lulzim Basha, duke përfunduar:

“Ne duhet të bëjmë gjithçka për të ndarë politikën nga krimi me iniciativa ligjore e qytetare dhe denoncuar aferat e përditshme korruptive të qeverisë më të korruptuar të Europës e ndër më të korruptuarat në botë. Nisni konsultimet me qytetarët në zonat tuaja për reformën territoriale.”