Hahn: Nëse Shqipëria mbetet pa gjyqtarë e prokurorë si rezultat i reformës, do të ishte katastrofë

Komisioneri për Zgjerim i Bashkimit Evropian, Johannes Hahn, tha sot se 25 shtete anëtare të BE ishin gati që të hapeshin negociatat me Shqipërinë, ndërsa theksoi se Bashkimi Europian do të konsiderohet i plotë vetëm pas integrimit të Ballkanit Perëndimor.

Hahn ka vlerësuar reformën në drejtësi, duke shtuar se ajo ka dhënë rezultate dhe duhet të vijojë, por do të kishte rezultat katastrofal nëse si pasojë e saj, Shqipëria mbetej pa gjyqtarë.

Për këtë, ai tha se me konsensus politik duhet të miratohet ligji i magjistraturës në mënyrë që të shmanget ky ngërç në sistemin gjyqësor.

 “Është detyrë e qeverisë dhe e opozitës që të zbatojnë shpejt reformën në drejtësi. Është ironike që si rezultat i vetingut të hasni një situatë që mos të kemi gjyqtarë. Kjo do ishte katastrofë”, tha Hahn.

Komisioneri për Zgjerim i bëri thirrje qeverisë që të ketë njerëz me përvojë në çdo ministri, në vijim të bisedimeve me institucionet e BE, në kuadër të çeljes së negociatave.

“Po hyjmë në një fazë të re që do jetë mjaft kërkuese me të dyja palët. Nga shtator do zhvillohen takime në Bruksel me fokus të kapitujt 23 dhe 24. Do jetë thelbësore në periudhën që vjen të caktohen burime në buxhet për tu përballur me këtë, por edhe brime njerëzore. Po shoh ministrin e financave, por jo vetëm ai, në çdo ministri të linjës, duhet të keni njerëz me njohuri se do negocioni me drejtoritë e specializuara të komisionit. Duhet të kemi njerëz me përvojë në mënyrë që të kryejmë ketë procedurë kaq të rëndësishme. Është thelbësore që të vijojnë përpjekjet në programin e përparësive të reformave”, tha Hahn.