Hamasi po përgatit një përgjigje pas ofertës për armëpushim në Gazë

Hamasi, grupi palestinez i shpallur organizatë terroriste nga Shtetet e Bashkuara dhe Bashkimi Evropian, po shqyrton ofertën e Izraelit për një armëpushim 40-ditor në luftën në Rripin e Gazës.

Duke u kthyer në Katar pas bisedimeve të fundit në Kajro, delegacioni i Hamasit tha se do të diskutonte idetë dhe një propozim, raporton RFE.

“Ne duam të përgjigjemi sa më shpejt të jetë e mundur”, tha një burim i Hamasit për AFP-në, në kushte anonimiteti.

Burime egjiptiane thanë për Al-Qahera News, një faqe e lidhur me shërbimet e inteligjencës egjiptiane, se delegacioni i Hamasit do të “kthehej me një përgjigje me shkrim”.

Sekretari amerikan i Shtetit, Antony Blinken i përshkroi kushtet e armëpushimit si “jashtëzakonisht bujare”, ndërsa Shtëpia e Bardhë u kërkoi kolegëve ndërmjetësues – Egjiptit dhe Katarit – të rrisin presionin ndaj Hamasit për të pranuar përpjekjen e fundit për t’i dhënë fund luftës gati 7-mujore.

Presidenti amerikan, Joe Biden u bëri thirrje udhëheqësve egjiptianë dhe të Katarit “të bëjnë çdo përpjekje për të siguruar lirimin e pengjeve të mbajtura nga Hamasi”, duke e quajtur atë “pengesën e vetme” për sigurimin e ndihmës për civilët në Rripin e rrethuar të Gazës.

Për muaj të tërë, Egjipti, Katari dhe Shtetet e Bashkuara janë përpjekur të sigurojnë një marrëveshje të re.

Gjatë një armëpushimi një-javor në nëntor, 80 pengje izraelite u shkëmbyen për 240 palestinezë të mbajtur në burgjet izraelite.

Bombardimet izraelite kanë shkatërruar Gazën e kontrolluar nga Hamasi, duke rrafshuar pjesën më të madhe të territorit dhe duke e çuar popullin e saj në prag të urisë.

Në qytetin jugor të Rafahut, palestinezët dëshpërohen nga lufta teksa kërkojnë viktimat e sulmit të fundit.

“Civilët që nuk kanë lidhje me Hamasin apo ndonjë grup tjetër u goditën nga një raketë, u copëtuan”, tha Um Louay Masri, në një ndërtesë të shkatërruar ku fëmijët po nxirreshin nga nën rrënoja.

Izraeli është zotuar të nisë një sulm ndaj batalioneve të Hamasit në Rafah, ku shumica e 2.4 milionë banorëve të Gazës kanë kërkuar strehim.

Por Ministri i Jashtëm, Israel Katz gjatë fundjavës tha se qeveria mund ta “pezullojë” atë operacion nëse arrihet një armëpushim.

Duke folur në Riad gjatë vizitës së tij të shtatë në rajon që nga fillimi i luftës së Gazës, diplomati i lartë amerikan Blinken theksoi nevojën që Hamasi “të vendosë shpejt” për një armëpushim.

Ai tha në një takim special të Forumit Ekonomik Botëror se “shpreson të marrë vendimin e duhur”, ndërsa ministri i Jashtëm egjiptian, Sameh Shoukry tha se “propozimi mori parasysh pikëpamjet e të dyja palëve”.

“Ne shpresojmë kështu”, shtoi ai.

Një burim i Hamasit i tha AFP-së se grupi ishte për një marrëveshje që “garanton një armëpushim të përhershëm, kthimin e lirë të të zhvendosurve, një marrëveshje të pranueshme për [shkëmbimin e të burgosurve dhe pengjeve] dhe fundin e rrethimit” në Gazë.

Izraeli vlerëson se 129 pengje mbeten në Gazë, duke përfshirë 34 që besohet të jenë të vdekur.

Sulmi i Hamasit rezultoi në vdekjen e rreth 1.170 njerëzve në Izrael, shumica prej tyre civilë.

Ofensiva hakmarrëse e Izraelit, raporton RFE, vrau të paktën 34.488 njerëz në Gazë, shumica prej tyre gra dhe fëmijë, sipas Ministrisë së Shëndetësisë në territorin e kontrolluar nga Hamasi.