Hapen klinikat dentare, parukeritë, qendrat tregtare. Masat rrisin koston…
Sot kanë hapur dyert klinikat dentare, parukeritë, berberët dhe qendrat tregtare, pas gati dy muajsh kur këto aktivitete u mbyllën si një masë për të parandaluar përhapjen e COVID-19, por në kushte tërësisht komplekse. Distancimi, dezinfektimi i duarve, përdorimi i maskave, mosgrumbullimi janë kushtet e reja, që siç duket se do të na shoqërojnë gjatë, ndërkohë për binzesin është e qartë se shumë kosto do ti bien mbi kurriz ashtu si dhe orari i kufizuar i punës, deri në orën 17:30.
Pas dy muajsh në karantinë, stomatologu Hydajet Ponari i është rikthyer punës në klinikën e tij në Tiranë. I gjithë personeli i klinikës është pajisur me masa mbrojtëse, ndërsa nuk lejohen më shumë se dy persona të cilët kanë nevojë për shërbim.
Dr.Hydajet Ponari thotë se ky protokoll i vendosur nga Komiteti Teknik kundër COVID, do të shoqërohet me rritjen e kostos së shërbimit tek dentisti, e cila përveç dentistëve do të bie edhe mbi kurrizin e qytetarit.
Në grupin e bizneseve që janë lejuar të ushtrojnë prej sot aktivitetin e tyre, janë edhe parukeritë dhe berberët.
Në parukeri gratë dhe vajzat nuk janë lejuar të futen pa maskë, doreza dhe përparëse. Në sallonet e bukurisë duhet të rezervosh një orar për të marrë shërbim, në mënyre që të shmangësh praninë e disa personave në të njëjtin ambient pritës.
“Kisha tre muaj pa i lyer, sapo mora vesh që do hapen lash direkt orar,” ishte njëra ndër klientet e parukerive të rihapura ndërkohë një tjetër zonjë shprehet:
“Duhet t’i lyeja flokët direkt pas karantinës, edhe për të hequr më shumë mendjen nga karantina!”
Edhe burrat nuk kanë munguar të rezervonin tek berberi.
Ndonëse këto biznese u lejuan të funksionojnë nën rregulla të rrepta të sigurisë, ato mund të qëndrojnë hapur deri në 17:30, pasi Tirana është një nga zonat e kuqe me të infektuar aktivë me COVID-19, orar ky që do të jetë dhe problemi kryesor i funksionimit të tyre, duke pasur parasysh se janë lënë vetëm 60 minuta për të gjithë ata që punojnë në orarin zyrtar 16:30.
