Hapen korridore humanitare, Zelenskiy: Zona e ndalim-fluturimit do të parandalonte katastrofën

Deri sa autoritetet ukrainase pas përpjekjeve të shumëta dhe negociatave me palën ruse, informojnë se kanë hapur 6 korridore humanitare, sot Presidenti ukrainas, Volodymyr Zelenskiy, tha se nëse nuk shpallet zona e ndalim-fluturimit për të mbrojtur Ukrainën, komuniteti ndërkombëtar do të jetë përgjegjës për katastrofë të madhe humanitare.

Në ditën e 14-të të luftës, Zelenskiy tha se Rusia ka rritur shkallën e sulmeve dhe se bota nuk mund të rri duarkryq.

“Rusia përdor raketa, aeroplanë dhe helikopterë kundër nesh, kundër civilëve, kundër qyteteve tona, kundër infrastrukturës tonë. Është detyrë humanitare e botës që të përgjigjet,” tha Presidenti Ukrainës.

NATO-ja ka hedhur poshtë mundësinë e zbatimit të ndalim-fluturimit për shkak të shqetësimeve të përballjes së drejtpërdrejtë me Rusinë.

Zelensky u ka bërë thirrje fuqive të Perëndimit që menjëherë të zgjidhin ofertën polake, e cila do t’i mundësonte shtetit të tij të furnizohej me aeroplanë luftarakë rusë MiG-29 – një lloj i aeroplanit luftarak që pilotët ukrainas dinë si ta përdorin.

Dje, Washingtoni ka hedhur poshtë idenë e Polonisë për t’ia dorëzuar SHBA-së aeroplanët rusë në bazën ajrore amerikane në Gjermani. Washingtoni tha se një veprim i tillë mund të përshkallëzojë konfliktin.

“Kur do të merret vendimi? Dëgjoni: Ne jemi në luftë! Ne nuk kemi kohë për këto shenja. Ky nuk është pingpong. Këto janë jetë njerëzish. Ne po bëjmë thirrje sërish: Zgjidheni shpejt. Mos u largoni nga përgjegjësia, na dërgoni aeroplanët,” tha Zelensky.

I pyetur si e sheh Moska ofertën polake, zëdhënësi i Kremlinit, Dmitry Peskov tha se kjo do të krijonte “një skenar potencialisht të rrezikshëm dhe të padëshirueshëm”.

Hapen 6 korridore humanitare

Moska tha se ka hapur sot korridoret humanitare për të dytën ditë me radhë, në mënyrë që njerëzit të largohen nga Kievi dhe katër qytete tjera, teksa numri i refugjatëve që largohen nga Ukraina ka kaluar shifrën 2 milionë.​

Civilët kanë nisur të largohen nga qyteti Sumi në makina private, pas hapjes së “korridorit humanitar”, ka thënë kryetari i këtij qyteti, Oleksandr Lysenko.

Ndërkohë Zv/Kryeministrja ukrainase, Iryna Vereshchuk, tha sot se Ukraina do të tentojë të evakuojë civilët përmes gjashtë korridoreve humanitare, përfshirë Mariupolin e rrethuar nga forcat ruse.

Përmes një video-mesazhi, ajo tha se forcat e armatosura ukrainase janë pajtuar për të ndalur luftimet për 12 orë, nga ora 09:00 deri më 21:00, dhe u ka bërë thirrje forcave ruse që të përmbushin zotimin e tyre për armëpushime lokale.

Ky lajm vjen pasi Ukraina ka arritur të kryejë me sukses evakuimet e para të martën.

Është vlerësuar se 5,000 persona kanë arritur që të largohen nga qyteti Sumi, i cili gjendet në kufi me Rusinë.

Autoritetet në Kiev kanë akuzuar më parë Moskën se është duke bombarduar korridoret humanitare, teksa njerëzit kanë tentuar të largohen nga Mariupoli.

Ende nuk dihet se ku çojnë gjashtë korridoret e propozuara humanitare.

Propozimet e kaluara për rrugë drejt Rusisë dhe Bjellorusisë janë refuzuar nga Qeveria ukrainase.

1.3 milion njerëz kanë ikur në Poloni”

Rreth 1.3 milion njerëz kanë ikur nga Ukraina në Poloni, prej pushtimit rus në Ukrainë, ka thënë Agjencia kufitare polake.

Në një postim në Twitter të mërkurën, Agjencia ka thënë se në mesin e njerëzve që kanë hyrë në Poloni, 93 për qind janë shtetas ukrainas, 1 për qind janë polakë dhe 6 për qind janë qytetarë të pothuajse 100 shteteve tjera.

Sipas saj, vetëm të martën, 125,800 njerëz kanë kaluar kufirin, për dallim nga rekordi i së dielës, 142,300.

Vetëm në mëngjesin e së mërkurës, në Poloni kanë hyrë 33,500 njerëz.

Polonia është shtëpia e shumë ukrainasve dhe shumë refugjatë është thënë se janë duke qëndruar te familjarët apo miqtë që kanë aty.

Mijëra polakë janë po ashtu nikoqirë të refugjatëve në shtëpitë e tyre.

OKB: Tani është koha për të ofruar ndihmë në kufij

Sipas Kombeve të Bashkuara, më shumë se 2 milionë njerëz janë larguar nga Ukraina prej nisjes së sulmit rus më 24 shkurt.

Agjencia e OKB-së për Refugjatë, tha se tani fokusi duhet të jetë në ofrimin e ndihmës për refugjatët në kufi, raporton Agjencia e lajmeve, Reuters.

Duke folur në një konferencë për media në Stokholm, Komisionari i Lartë i kësaj Agjencie, Filippo Grandi, tha se “tani është koha që ketë përpjekje për ndihmë në kufi” sesa që vetëm të ketë diskutime sesi refugjatët të ndahen mes shteteve.

Grandi tha se Moldavia, e cila nuk është anëtare e Bashkimit Evropian, por ndan kufi me Ukrainën, është veçanërisht e cenueshme për shkak të fluksit të refugjatëve. Të shtunën, Ministria e Jashtme e Moldavisë tha se shteti është afër “pikës së thyerjes”./RFE/