Hapen korridoret ajrore me Shqipërinë, ulet kostoja dhe koha e udhëtimit
Hapja e korridoreve ajrore të Kosovës me Shqipërinë është cilësuar sot si moment i rëndësishëm për aviacionin, efikasitet i mbrojtjes së natyrës, ulje e kohës dhe kostos së udhëtimeve.
“Përtej përfitimeve mjedisore dhe infrastrukturore, koha e shkurtuar e fluturimit sjellë benefite edhe për mërgatën tonë. Rriten mundësitë për çmime më të përballueshme të biletave, si dhe për destinacione të reja për dhe nga Aeroporti i Prishtinës ‘Adem Jashari’,” tha Kryeministri i Kosovës, Albin Kurti, në ceremoninë zyrtare të hapjes së korridoreve ajrore, mundësi kjo për të cilën Ministri i Infrastrukturës, Liburn Aliu, shtoi.
“Më parë ishte mundësia e vetme për hyrje në Kosovës nëpërmjet Maqedonisë së Veriut, tash e kemi shtuar edhe korridoret e reja e që krahas punëve që janë bërë në zgjerimin e pistës dhe avancimin e sistemeve të navigimit, personeli dhe mundësitë e Agjencioneve tona tashmë janë të shtuara.”
Ndërkohë Ambasadori i Gjermanisë në Kosovë, Jorn Rohde, ka treguar konkrektisht koston e udhëtimit më parë dhe lehtësimin që do të sjellë hapja e korridoreve ajrore me Shqipërinë.
“Deri më 28 dhjetor, kompanitë ajrore që kanë ardhur në Kosovë, është dashur të fluturojnë drejt Shkupit që të aterojnë në Prishtinë. Kjo do të thoshte 25 minuta udhëtime shtesë, 540 litra kerozhinë, 200 emetime të dioksidi i karbonit.”
Ndryshe, njoftimi për hapjen e korridoreve ajrore u bë më 28 dhjetor të vitit 2023. Ambasadori i Gjermanisë në Kosovë, Jorn Rohde, tha se hapja e rrugëve të reja ajrore për Kosovën u arrit pas një pune ekipore 15-mujore me autoritetet e Kosovës, Shqipërisë, por dhe me ndihmën e misionit të NATO-s në Kosovë, KFOR.
