Hapet gara për Milot-Balldre. Ja çfarë parashikon projekti…

Projekti i tretë i paketës “1 miliardë”,  rruga Milot-Balldre,  ka hyrë në fazën e prokurimit.

Ministria e Infrastrukurës dhe Energjisë hapi këtë sot garën për këtë rrugë me një fond limit prej 20 miliardë lekësh.

Më herët qeveria shpërbleu kompaninë A.N.K sh.p.k me një bonus 8.5 për qind të pikëve për ofertën e saj të pakërkuar lidhur me këtë rrugë çka nënkupton se kjo kompani do të hyjë me pikë eksta në garë ndëkrohë që kompani të tjera nuk kufizohen për të marrë pjesë në tender.

Sipas dokumenteve të bëra publike  projekti i propozuar përfshin ndërtimin e segmentit rrugor “MILOT – BALLDRE”, si dhe ndërtimin e tunelit me 1 portal në malin e Rencit. Gjatësia e autostradës Milot-Balldren është 17.2 kilometra përfshire rrugën automobilistike kryesore dhe tunelin përkatësisht me këto gjatësi: a) Rrugë automobilistike kryesore 15 km+570.35m

b) Tuneli me 1 portal, me gjatësi 850m

c) Ura e Matit me gjatësi 620 m

d) Ura e Drinit, me gjatësi 223.4 m

Gjithashtu propozohet ndërtimi në total i 9 500 m rrugë dytësore dhe rrugë lidhëse të nyjeve për të mundësuar dhe lehtësuar qarkullimin e banorëve të kësaj zone.

Qeveria ka vënë theksin vazhdimisht tek përfitimet që do të sjellë kjo rrugë sidomos në zhvillimin ekonomik të Milotit dhe Lezhes. “Ky aks lehtëson gjithashtu komunikimin me pjesën tjetër të veri-perëndimit në Shqipëri dhe me shtetin fqinj Malin e Zi.

Kjo rrugë njëkohësisht realizon dhe bajpasin e qytetit të Lezhës që është shumë i domosdoshëm për këtë qytet” thuhet në dokumentet zyrtare.

Edhe në këtë rast parimi që do të ndiqet është ai i “çelsave në dorë” që do të thotë se koncesionari do ta ndërtojë dhe më pas mirëmbajë në harkun kohor të 13 viteve këtë vepër infrastrukturore.

Më herët qeveria dha kontratën e rrugës së Arbrit tek Gjoka Konstruksion ndërkohë që Thumanë-Vorë u fitua nga Gener 2 duke i hapur rruge negocimit të kontratës.