Hapet Panairi i Librit në Prishtinë
Nën moton “Inteligjenca rrjedh nga libri”, sot është hapur edicioni i 25-të i Panairit të Librit në Prishtinë ku marrin pjesë rreth 100 botues nga Kosova, Shqipëria, Maqedonia e Veriut dhe Diaspora, me rreth 2000 tituj të rinj.
Kryetari i Shoqatës së Botuesve të Kosovës, Edon Zeneli, tha se ky Panair ka shërbyer gjithnjë si dritarja kryesore e leximit në Kosovë.
“Libri vijon të jetë porta magjike më e ndier e më e lirë për njeriun,” tha Erdon Zeneli ndërsa Drejtoresha e Drejtorisë së Kulturës në Komunën e Prishtinës, Sibel Halimi, tha se ky Panair është rikthim te burimi më njerëzor i dijës, libri.
“Çdo libër i lexuar është një takim i ri,” tha Sibel Halimi.
Panairi do të jetë i hapur për vizitorë çdo ditë nga ora 9:00-21:00. Panairi do të mbyllet më 15 qershor në orën 19:00.
Ndryshe, Panairi i librit në Prishtinë, organizohet nga Shoqata e Botuesve të Kosovës, me ndihmën dhe bashkëpunimin e Ministrisë së Kulturës, Rinisë dhe Sportit, Komunës së Prishtinës dhe Pallatit të Rinisë.
