Hapet Panairi Ndërkombëtar i Turizmit, Kosova një potencial turistik
Në Prishtinë është hapur edicioni i katërt i Panairit Ndërkombëtar të Turizmit “Kosova 2025”, që synon promovimin e Kosovës si një destinacion me potencial turistik dhe forcimin e bashkëpunimi ndërkombëtar në këtë sektor.
Në hapje të panairit ministrja e Industrisë, Ndërmarrësisë dhe Tregtisë Rozeta Hajdari, e vlerësoi turizmin si një shtyllë kyçe e zhvillimit ekonomik .
“Panairi si një platformë që bashkon liderët për të fuqizuar sektorin e turizmit, si një shtyllë kyçe e zhvillimit ekonomik dhe ruajtjen e trashëgimisë kulturore. Vetëm në këtë mandat kemi rritje prej 50 për qind të numrit të turistëve krahasim me vitet 2017-2020,” tha Rozeta Hajdari ndërsa Kryetari i Unionit të Turizmit të Kosovës, Baki Hoti, tha se panairin e parë e filluam me 60 kompani dhe sot kemi mbi 340 kompani nga 16 shtete nga e gjithë bota.
“Është nder që kemi arritur deri këtu që është një hap i rëndësishëm, filluam me 60 kompani dhe sot kemi mbi 340 kompani nga 16 shtete nga e gjithë bota. Turizmin e përmbyllëm vitin e kaluar me një rritje prej 36.8 për qind në raport me vitin e kaluar. Po punojmë bashkë me gjithë aktorët dhe partnerët tanë ndërkombëtar, që edhe viti 2025 të jetë vit i suksesit për Kosovën.”
Ndërkaq, Kryetari i Komunës Prishtinë, Përparim Rama shtoi se edhe kryeqyteti e sheh turizmin si një mundësi që synon ofrimin e një mjedisi të favorshëm për turistë.
Ndryshe, Panairi Ndërkombëtar të Turizmit “Kosova 2025” i cili do të mbahet nga 10-11 Prill u organizua nga Unioni i Turizmit i Kosovës, me mbështetjen e Ministrisë së Industrisë, Ndërmarrësisë dhe Tregtisë, dhe nën kujdesin e Komunës së Prishtinës.
