Hapja e dosjeve, gju më gju me spiunët!
nga Agim Popoci
Tregtari me gjakun e të përndjekurve politik nga dita kur shkeli në krye të Partisë Demokratike e derisa u bë bashkë me kryetarin e Partisë Socialiste për të miratuar ligjin, që ai dhe mbështetësit e tij e proklamojnë si “Ligj për Hapjen e Dosjeve”, e pa si nevojë të domosdoshme sqarimin e këtij ligji i cili ende pa u botuar në Fletoren Zyrtare u kuptua nga shqiptarët se nuk ishte asgjë tjetër përveç se një mashtrim i radhës Rama-Basha.
Për të realizuar këtë mision, sa të vështirë aq edhe të pakuptueshëm, Lulzim Basha urdhëroi kryetarin e Grupit Parlamentar që Conchita e emëroi dhe kryetar të PD, Enkelejd Alibeajn, në mënyrë që gjithë ta kenë të qartë se çfarë u votua mbrëmjen e së enjtes meqë as deputetët e tij nuk e kanë të qartë, dhe nxjerrin nga goja gjithçka që për Taulant Ballën mjafton të mos zemërohet, nëse shoqërohet me sharje kundër Sali Berishës!
Nisi si takim gju më gju me intelektualët, u tha nga drejtuesi i ngarkuar nga Lulzim Basha se çfarë përmban ky ligj dhe amendamentet e propozuara nga PD, cili ishte procesi dhe si ka ndodhur, se hapja e dosjeve ka synim informimin e publikut shqiptar, por, për çështje që kanë të bëjnë me sigurinë kombëtare, nuk hapen si informacion.
Me këtë rast, Enkelejd Alibeaj siguroi se e vërteta e mbajtur e mbyllur nuk do të serviret e përpunuar as nga Autoriteti i Dosjeve.
Deri këtu gjithçka shkonte vaj, ashtu siç kishte parashikuar Kunati si tregtar i komunikimit, por realiteti dhe e drejta e fjalës së “intelektualëve” në takim tregoi se Lulzim Basha nuk bënë asgjë pa spiunët e Sigurimit të Shtetit, edhe kur i ul intelektualët gju më gju!
Duke respektuar traditën e odave, u mirëpritën të ftuarit, u thanë të gjitha dhe radhën e kishte Çiftelia! Jo karadyzeni dhe tamrra që njihet nga malësorët vegla muzikore kordofone me dy tela, as “intelektuali” që e pagëzoi kryetari i Grupit Parlamentar të PD, por bashkëpunëtori i Sigurimit të Shtetit, Preç Zogaj!
Ç’ne përfaqësuesi i spiunëve të Mirditës, Durrësit dhe gjithë Shqipërisë, gju më gju me simbolet e vuajtjes komuniste, apo pak rëndësi kur Lulzim Basha e ka të qartë se shqiptarët heshtin, janë më hipokritë se spiunët që sot qeverisin vendin pa u lëvizur qerpiku për krimet që kanë kryer; Do të heshtin, ashtu siç heshtën kur padrejtësisht i përndjekuri politik Enkelejd Alibeaj nuk u zgjodh Sekretar i Përgjithshëm i PD me urdhër të Lulzim Bashës kryetar, por, ai që sot e akuzojnë si avokati i të birit të Enver Hoxhës! Dhe, në fund, po ky kryetar i Partisë Demokratike mori guximin që edhe për Sekretar të Përndjekurve Politik të PD ta emëroj partizanen nga celula komuniste e vitit 1997 “Koha Jonë”, Jonila Godolen, sepse thjeshtë ishte bindur, se shqiptarët heshtin!
Kështu rezultoi edhe në këtë takim intelektualësh, dhe Lulzim Basha kishte të drejtë! Nuk u revoltua asnjeri prej atyre që ishin prezent kur mori fjalën Çiftelia, madje as prej atyre që kishin vuajtur nga Sigurimi i Çiftelisë, mjaftonte që nuk quhej Sali ose Ilir dhe ai ishte i besueshëm, dhe do jetë ashtu siç ka rrëfyer kohë më parë Çiftelia, se ishte spiun, por nuk kishte marrë njeri në qafë!
E këtë dhe situata të ngjashme me Ligjin e sapomiratuar, pavarësisht broçkullave që nxjerrin nga goja asqerët e Lulzim Bashës, nuk do ta ketë në dorë ta gjykoj Autoriteti i Dosjeve por dora vetë, Edi Rama!
Sepse, ishte po ky Autoritet i cili nxori dokumentin se anëtari i KLP, Bujar Sheshi, ishte bashkëpunëtor i Sigurimit të Shtetit, por gjykata e bëri nul dhe spiuni vazhdoi punë në majën e piramidës së reformuar të drejtësisë!
A do të ndodhë edhe me rastet tjera kur Autoriteti i Dosjeve do të zbatoj dhe amendamentin e propozuar nga entuziastët e Lulzim Bashës që gënjejnë miletin se hapën dosjet, dhe ai vendim do humb rrugën në drejtim të paditur?!
Kjo nuk mbetet për tu parë, përderisa tregtari i gjakut të përndjekurve politik nuk e tha asnjë fjalë për Bujar Sheshin, dhe i shiti votat e mbështetësve të tij në emër të “hapjes së dosjeve” pa e fut në paketë edhe Ligjin e Lustracionit! Sepse, ndryshe ëndrra e hetuesit të Sigurimit të Shtetit, Ardian Dvorani, për tu bërë anëtar i Gjykatës Kushtetuese do të ngelej në sirtar! Akt të cilin Edi Rama jo vetëm që nuk e honeps dot por bie ndesh dhe me deklaratën e pakuptimtë që bëri nga foltorja e parlamentit, se Ligji i Lustracionit është një truk për të mos u hapur kurrë dosjet e Sigurimit të Shtetit!
Kështu historia do përsëritet, sërish do të ndodhë bashkimi i votave me komunistët e PS si për këtë Ligj, votim të cilin këta shërbëtor pa dinjitet që nisen të ulen gju më gju me intelektualë dhe ulen me spiunë, e arsyetuan duke ju referuar të mirës së qytetarëve; E mirë kjo qytetare që prevalon me logjikën e tyre edhe në rastin e miratimit të Buxhetit 2023, i cili rrit rrogat dhe pensionet, pavarësisht pse rritë dhe pagesat e miqve inceneratoristë!
