Hapja e negociatave, Berisha: Nuk u bllokua nga Greqia, por Rama për interesat e tij mafioze!

Kryeministri Edi Rama bllokoi sërish çeljen e negociatave, tha Kryetari i Partisë Demokratike, Sali Berisha, duke reaguar pas konkluzioneve të Këshillit Evropian ndërsa bëri të ditur se opozita do kërkojë dorëzimin e mandatit të Ramës.

Me përfundimin e Samitit BE-Ballkani Perëndimor, Kryetari i Partisë Demokratike sqaroi se hapjen e negociatave nuk e ka bllokuar Greqia, por Edi Rama për interesat e tij mafioze.

“Në deklaratën e liderëve të BE, të mbledhur në Bruksel me udhëheqjen e vendeve të Ballkanit Perëndimor, rezulton se Shqipëria mbetet në klasë.

Prej një viti e gjysëm nga takimi i Brukselit, negociatat de facto nuk po hapen.

Edi Rama është shkaktari kryesor i këtij bllokimi de facto të procesit të integrimit nga viti 2013 gjer në vitin 2023, pra nj dekadë me radhë.

Edi Rama ka përkeqësuar për interesa personale të pushtetit të tij demokracinë, gjendjen ekonomike. Ka zëvendësuar shtetin ligjor me kodin e mafies dhe narkoshtetit.

Ai është sot kreu i qeverisë më i pavlerësuar, më i pabesueshëm në të gjithë qeveritarët e Europës, më konkretisht vendeve që aspirojnë anëtarësimin në BE.

Në Kongresin e tij, ai paralajmëroi shqiptarët duke fajësuar njëherë Greqinë dhe njëherë tjetër boshtin evropian se Brukseli nuk do hapë negociatat për Shqipërinë. Duke aluduar kryesisht për çështjen Beleri.

E vërteta është se në deklaratën e liderëve të BE, çështja më kryesore, apo numër 1, që pengoi hapjen de facto të negociatave me Shqipërinë, është mungesa e dialogut për shkak kjo të qëndrimeve dhe veprimeve të Edi Ramës, grusht shteti brenda shtetit, duke marrë të gjitha kompetencat e parlamentit, fakt ky i denoncuar në mënyrë të përsëritur gjatë muajit të fundit dy herë nga Komisioni Europian, si në raportin e Komisionit, ashtu edhe në deklaratën e zyrës së zotit Borrel, si një akt që nuk ndodh kund përveçse në Shqipëri.

Këshilli i Ministrave të BE, refuzoi të hapë negociatat për kapitullin e parë, të japë dritën jeshile sepse Edi Rama në vend të dialogut dhe zgjidhjes me dialog të problematikave të mëdha, ka zgjedhur puçin e shtetit brenda shtetit, bllokimin e të drejtave kushtetuese të opozitës dhe përqendrimin e të gjitha pushteteve në duart e veta.

Edi Rama ka zgjedhur bllokimin me çdo çmim dhe duke penalizuar çdo shqiptar që ka ëndërr integrimin evropian, bllokimin e komisioneve hetimore për Edi Ramën, familjarët e tij, për aferat superskandaloze, vjedhjet e mëdha me djegësin e shekullit, me Portin e Durrësit, me sterilizimet, por dhe dhunimin e Kushtetutës nga anëtarë të familjes Rama, për çka PD do paraqesë kërkesën për dorëzimin e mandatit nga ky hajdut që nuk njeh ligj, moral dhe Kushtetutë,” tha Sali Berisha duke shtuar se ditën kur mblidhej samiti i Brukselit, prokuroria politike e Edi Ramës rrëmbeu një gazetar.

“Edi Rama është autor kryesor i bllokimit të hapjes së negociatave me Shqipërinë, sepse Shqipëria është vendi i dhunimit të egër të të drejtave të lirisë së medias dhe gazetarëve.

Ditën kur mblidhej samiti i Brukselit, prokuroria politike e Edi Ramës si një qelizë terroriste, rrëmben një gazetar në dhunim të ligjeve të vendit dhe ligjeve ndërkombëtare të medieve, për fajin e vetëm se ai ka publikuar dosjen që ata vetë e kanë shitur me shuma ndoshta miliona euro te bandat.

Cilido që lexon publikimin e guximshëm të Elton Qynos, i dërgon atij urimet më të mira për misionin.
Se me publikimin, Qyno informoi publikun shqiptar dhe ndërkombëtar se ja cila është dosja që është shitur nga skapistët.

Një gjë është e sigurt, se Qyno nuk ka hyrë në dhomat e skapistëve për t’ua vjedhur dosjen. Dhe ai ka meritë të veçantë që informoi publikun për tregun kriminal të dosjeve të krimit nga grupe të strukturuara kriminale brenda SPAK-ut.

Ditën që në deklaratën e liderëve europianë për Shqipërinë, kërkohej nga Shqipëria respektimi i lirisë së medieve, rrëmbehej gazetari pa avokat në zyrat e policisë sekrete të Edi Ramës, Skapit të partisë.

Pra, edhe njëherë, nuk janë problemet që ka Europa, që kanë vendet evropiane, ato kanë qenë, janë dhe do jenë se gjithmonë krijohen mes vendeve fqinje, mes vendeve të lira, por janë qëndrimet mafioze të narkodiktatorit Edi Rama që nuk lejuan vendimin pozitiv të çeljes së negociatave për kapitujt e parë me Shqipërinë,” tha lideri i opozitës i prerë se hapjen e negociatave e ka bllokuar Edi Rama për interesat e tij mafioze.

“Nuk ka diskutim se në këtë vendim një peshë të veçantë ka pasur dhe ka qëndrimi ndaj minoriteteve, por ky qëndrim i BE është një parim themelor që nuk ka lidhje me Shqipërinë në mënyrë specifike, por ka lidhje me çdo vend aty ku jetojnë minoritetet.

Edi Rama mund ta akuzojë Greqinë duke mashtruar shqiptarët, por e vërteta është se shkaku kryesor nuk është Greqia. Thashë, pika e parë është mungesa e dialogut.

Por shkaku kryesor është dhunimi nga Edi Rama i parimeve më themelore të të drejtave të njeriut dhe parimeve ndërkombëtare të drejtësisë.

Mosrespektimi i prezumimi i pafajësisë e bën bllokimin e betimit një akt antikushtetues në ligjet shqiptare. Një akt që dhunon në mënyrë flagrante konventën evropiane të të drejtave të njeriut.

Dhe kjo bëhet vetëm e vetëm për pushtimin e Edi Ramës dhe grupeve të tij mafioze të tokave dhe trojeve në Himarë, të cilat Beleri nuk do i lejonte kurrë.

Pra, shikoni se si për interesa mafioze, për interesa strikt pasurimi, u bie vizë marrëdhënieve me një vend fqinj, i cili jo vetëm që nuk ka bllokuar, por ka mbështetur të gjithë procesin e integrimit europian dhe euroatlantik të Shqipërisë.

Pra është Edi Rama me qëndrimet e tij dhe jo Greqia, e cila nuk kërkon asgjë tjetër, vetëm atë që ligjet shqiptare dhe praktika shqiptare dhe botërore përcakton në parimin e pafajësisë dhe atë që praktika shqiptare e ka përcaktuar në raste të tjera, kur kandidatët kanë qenë shqiptarë.

Problem tjetër madhor që lexohet në dokumentin e Këshillit është problemi i luftës kundër krimit dhe korrupsionit.

Emërimi i Taulant Ballës në krye të Ministrisë së Rendit, person me rekorde ndër më kriminalet në Europë, zbulimi i bisedave të Edi Ramës me telefonat e kriptuar, ka shkaktuar rrëqethje në kabinetet evropiane.
Ndaj dhe ata kanë vendosur aty luftën kundër korrupsionit dhe krimit të organizuar si një kusht i pakapërcyeshëm.

Kushtet e tjera lidhen me reformën e pronësisë, regjistrimin dhe kompensimin e pronave në mënyrën më transparente. Luftën kundër falsifikimeve në këtë fushë, pasi trafikantët të llojit Pëllumb Gjoka e të tjerë, kanë pushtuar miliona e milionë metër katrorë tokë të pronarëve legjitimë.

Reformat, thotë deklarata e BE, për integrimin evropian, janë një kusht tjetër. Dhe reformat janë një univers me të cilat Edi Rama nuk ka asnjë lidhje sepse ai bën reforma vetëm në interesin e tij, siç ishte kjo e sotmja me rregulloren, ku bëhet i pari lider në botë që voton heqje të përkohshme mandatesh për opozitën.

Së fundmi, përsëri miratimi i vendimeve bazuar në ligjin e minoriteteve. Kjo është një detyrim kombëtar dhe ndërkombëtar. Ata të cilët kanë frikë nga minoritetet, ata janë siç thotë Fridih Niçe, horrat në strofullën e fundit të nacionalizmit.

Minoritetet janë të pranishme në çdo vend dhe është e mjerë ajo shumicë, nuk është e lirë ajo shumicë që nuk garanton të gjitha liritë dhe të drejtat e minoriteteve.

Nga viti 2017 gjer sot, Edi Rama nuk firmos vendimet e duhura, në përputhje me ligjin që ka votuar në vitin 2017.

Kusht tjetër është edhe censusi, që është marrë vesh se po bëhet thjesht një transpozim i dokumenteve nga gjendja civile te dokumentet e censusit pa asnjë lloj transparence,” tha Kryetari i Partisë Demokratike, Sali Berisha duke siguruar në fund edhe partnerët ndërkombëtare dhe Bashkimin Evropian.

“PD, duke dënuar me forcën më të madhe Edi Ramën si përgjegjësin kryesor Edi Ramën për moshapjen e negociatave, kapitullit të parë, garanton partnerët ndërkombëtare dhe BE se ajo ka shpallur dhe shpall si interes, si yll polar, procesin e integrimit të Shqipërisë në Europë dhe është e vendosur që ndërmarrë çdo akt, veprim dhe ligj për një ecuri të pandalshme të Shqipërisë në BE.”

Ndryshe, me përfundimin e Samitit BE-Ballkani Perëndimor u bë e ditur se Këshilli Evropian nuk do të hap me Shqipërinë kapitujt e parë negociues për anëtarësim në BE, si për tensionet politike në vend duke i kërkuar që dialogu politik gjithëpërfshirës dhe konstruktiv në vend të mbetet thelbësor për të çuar përpara miratimin e reformave të lidhura me BE-në, ashtu dhe “çështjen Beleri” e cila u trajtua si respekt i të drejtave të minoriteteve