Hapja e Zyrës së Mbrojtjes ruse në Serbi, kërcënim serioz për Kosovën

Hapja e Zyrës së Mbrojtjes së Rusisë në kuadër të Ministrisë së Mbrojtjes së Serbisë, eksperti i çështjeve ushtarake dhe të sigurisë, Ramadan Qehaja e cilëson si një hap të paramenduar të Beogradit zyrtar për zbatimin e një lufte speciale për të kërcënuar shtetet fqinje, në veçanti Kosovën.

Këtë veprim, ai e konsideron si të rrezikshëm dhe një sfidë para se gjithash për vetë NATO-n, kur dihet se Serbia tashmë ka krijuar një partneritet të afërt bashkëpunues me Rusinë dhe Kinën, vende këto të cilat kanë ambicie për zgjerimin e ndikimit të tyre në Ballkan.

“Rritja e armatimit të Serbisë ngërthen një kërcënim direkt për stabilitetin e rajonit dhe është në mospërputhje me pretendimet gjoja bashkëpunuese të lidershipit aktual në Serbi për kinse arritjen e një paqe të qëndrueshme në rajon. Zyrtarizimi i tillë i prezencës ushtarake ruse në Serbi duhet të shërbejë si kambanë e fundit për institucionet tona që të ngritin gatishmërinë institucionale e në veçanti të atyre të sigurisë dhe të monitorojnë zhvillimet e fundit të cilat gjithsesi se kanë për qëllim nxitjen e destabilizimit në Kosovë e rajon,” thekson Qehaja në reagimin e tij duke kërkuar nga diplomacia e Kosovës që të veprojë në drejtim të një ribashkërendimi me partnerët ndërkombëtarë për t’i informuar lidhur me lëvizjet e fundit në Serbi, të cilat janë kundër interesave të partnerëve bilateralë kryesorë dhe NATO-s.

Pavarësisht prej situatës së krijuar nga veprimet e lartëpërmendura serbe, eksperti i çështjeve ushtarake dhe të sigurisë, Ramadan Qehaja, shton:

“Kosova duhet përveç përgatitjeve për vetëmbrojtje, të vijoj aspiratën e saj për fuqizim tutje të aleancës me aktorët perëndimorë si një vizion i vetëm i palëkundur në funksion të paqes dhe sigurisë në Ballkan e Evropë.”