Haradinaj anulon vizitën në Pragë, reagon shefi i diplomacisë…
Ramush Haradinaj ka anuluar pjesëmarrjen në Samitin e Vishegradit që zhvillohet nesër në Pragë.
Agjencia çeke e lajmeve CTK, ka raportuar se autoritetet e Kosovës e kanë anuluar pjesëmarrjen në Samit për shkak të deklaratave të presidentit çek, Millosh Zeman, të bëra në Beograd se do të tërhiqet njohja e Kosovës ndërsa nga Zyra e Haradinajt vetëm sa është konfirmuar anulimi i pjesëmarrjes në Samit.
Por Ministri i jashtëm i Republikës Çeke, Tomas Petricek, duke sqaruar se nuk është Presidenti por Qeveria ajo që është përgjegjëse për politikën e jashtme, tha se qëndrimi për pavarësinë e Kosovës nuk ndryshon.
“Qeveria çeke, e cila është përgjegjëse për politikën e jashtme, nuk e ka ndryshuar qëndrimin e saj për Kosovën ose ndonjë prej shteteve të Ballkanit Perëndimor. Ne do të vazhdojmë të mbështesim dialogun mes Serbisë dhe Kosovës, dhe rrugën e tyre drejt Bashkimit Evropian,” thekson Petricek përmes rrjetit social Twitter.
Ndryshe, në Samitin e Vishegradit, përveç Çekisë, Sllovakisë, Polonisë dhe Hungarisë, marrin pjesë kryeministrat edhe të Ballkanit Perëndimor.
