Haradinaj i thotë Thaçit: Nuk ka ndryshim kufijsh!

Kryeministri Kosovës, Ramush Haradinaj i thotë  në sy presidentit Hashim Thaçi se kundërshton përsëri idenë e tij për korrigjim të kufijve me Serbinë.

Thaçi përmendi korrigjimin e kufijve pasi ndau urdhërin “Hero i Kosovës” për 158 dëshmorët e varrosur në Kompleksin Memorial në Marinë, ndërsa në fjalimin e tij, Haradinaj e kundërshtoi këtë ide, raporton KTV.

“Duhet forcuar shtetin, në ekonomi, politikë të brendshme dhe të jashtme, për të ruajtur Kosovën, për ta ruajtur territorin e vet dhe, kufijtë e vet t’i ruajë të paprekshëm prej kurrkujt, qoftë ai këtu me ne, qoftë tjetër kund, për shkak se këta kufij na i ka lënë amanet këta që po i rahatojmë”, tha kryeministri Haradinaj, duke shtuar se të gjithë duhet ditur se rritja jonë na pëlqen të gjithëve, por kurrënjëherë nuk guxojmë të lëvizim atë që është arritur me gjak.

Ky është rasti i parë publikisht që Haradinaj ia ka përsëritur Thaçit se do t’i mbrojë kufijtë nga ai.

Që nga paraqitja e parë e Thaçit në publik për ndryshim të kufijve, Haradinaj ka dalë kundër duke thënë se ndryshimi i kufijve çon në luftë.