Haradinaj: Kosova e paluhatur në misionin e çrrënjosjes së ISIS-it

Kryeministri i Kosovës, Ramush Haradinaj tha se Kosova qëndron e paluhatur në misionin për çrrënjosjen e grupit militant, Shteti Islamik, ISIS, si dhe elementeve të tjera të ekstremizmit të dhunshëm, raporton RFE.

Përmes një postimi në Facebook, Haradinaj tha se është duke përcjell me vëmendje operacionin e largimit të trupave ushtarake amerikane nga Siria.

Kosova, sipas tij, do të vazhdojë të “jetësojë përgjegjësitë dhe rolin e saj” në operacionet për siguri, si pjesë e koalicionit botëror kundër ISIS-it që udhëhiqet nga Shtetet e Bashkuara.

Presidenti i SHBA-së, Donald Trump gjatë kësaj jave ka njoftuar se trupat amerikane do të tërhiqen nga Siria, pasi siç është shprehur ai, ata kanë përfunduar me sukses misionin e tyre kundër ISIS-it, dhe se këto trupa më nuk janë të nevojshme në këtë shtet.

Presidenti turk, Recep Tayyip Erdogan tha dje se pas vendimit të SHBA për t’i tërhequr trupat nga toka siriane, Turqia do ta pastrojë Sirinë nga milicia kurde dhe militantët e grupit ekstremist, Shtetit Islamik, ISIS.