Haradinaj-Kurz: Liberalizimi i vizave të futet në agjendën e BE-së

Kryeministrit i Kosovës, Ramush Haradinaj ka kërkuar sot në Vjenë nga kancelari austriak, Sebastian Kurz, që liberalizimi i vizave të futet në agjendën e Bashkimit Evropian duke shtuar se Kosova është e përkushtuar në fuqizimin e bashkëpunimit rajonal dhe e gatshme të marrë përsipër obligimet e saja, por se kjo duhet të jetë reciproke.

“Kosova është vendi i vetëm në BE dhe rajon që ende nuk lëvizë lirshëm dhe nga Kancelari Kurz kërkova që liberalizimi i vizave, të futet në agjendën e BE-së, sepse Kosova ka përmbushur të gjitha kriteret e vëna nga BE,” tha Haradinaj duke shtuar se përveç të drejtës për lëvizje të lirë, liberalizimi i vizave për Kosovën do të thotë më shumë partneritet, më shumë treg e mundësi këmbimi për vendet e BE-së dhe rajonit.

Ndryshe, sot në Vjenë liderët e vendeve të Ballkanit Perendimorë zhvilluan një mëngjes pune me kancelarin Sebastian Kurz, ku kryeministri i Kosovës, Ramush Haradinaj bëri të ditur përmes rrjetit social Facebook se ka informuar homologët se vendi ka shënuar progres në implementimin e MSA-së dhe ERA 1 dhe se tani po presim edhe lansimin e ERA 2.