Haradinaj: LDK fajtore për 53 milionë eurot e “Bektel Enka”. Interpelanca mbyllet pa lidhje…

Kryeministri i Kosovës, Ramush Haradinaj ka deklaruar se ish ministri i Infrastrukturës, Lutfi Zharku është fajtor për 53 milionët që Kosova i detyrohet kompanisë “Bektel Enka”.

LDK-ja, sipas tij, në kohën e qeverisjes paratë i ka dërguar në komunat e udhëhequra nga kjo parti, dhe nuk duhet shitur moral meqë borxhin e ka pranuar vet Zharku.

“E kemi gjet në tavolinë një marrëdhënie të borxhit fillestar prej 14.7, e kemi gjet se nuk kanë pas guxim. Sot ju tregoj votuesve të LDK-së, që e kanë pranu këtë borxh. Ne është dashtë me gjet zgjidhje qysh me vazhdu punën e mos me u denu, apo me lan rrugën në gjysmë. Ne e kemi ripranuar një marrëdhënie,” tha ai duke shtuar Lutfi Zharku është fajtor.

“Në vitin 2017 i kanë shtu 30 projekte të paplanifikuar prej 9 milionë për komunat që i ka udhëheq LDK-ja. Normale pak se PDK-ja kanë thanë s’na i ka mbështet komunat. Por, paret është dashtë me i lanë për projektin e madh që po flasim. Në vitin 2016, 116 projekte të paplanifikuara, qyky ministri që po na shet moral. Fajtor për këtë është Lutfi Zharku dhe askush tjetër.”

Shala: Vendim arbitrar!

Kujtim Shala i LDK-së  duke replikuar me kryeministrin Haradinaj për pagesën prej 53 milionëve dhënë Bechtel-Enkas për zgjatjen e punimeve në autostradën Prishtinë-Hani i Elezit, tha se kryeministri po e bën edhe më të paqartë dhënien e 53 milionë eurove. Sipas tij, qeveria Mustafa nuk i ka paguar 14.7 milionë euro pasi që do të ishte vendim i paragjykuar, ndërsa vendimin e qeverisë Haradinaj e ka quajtur arbitrar dhe të pabazuar ligjërisht.

“Përfaqësuesit e Qeverisë kanë qenë të paqartë, Kryeministri me fjalën e sotme e ka bërë edhe më të paqartë,” tha Shala duke shtuar nuk është marrë vendimi për ta paguar 14.7 milionë euro në Qeverinë Mustafa sepse do të ishte vendim i marrë me paragjykim.

Lidhur me deklaratën e Haradinajt, se mjetet që duhej t’i paguheshin Bechtel-Enkas janë dërguar në komunat ku ka qeverisur LDK ai sqaroi:

“Gjatë kohës kur kam qenë ministër, projektet më të shumta i kam pasur në komunat ku ka qeverisur AAK, në Deçan, në Obiliq, prandaj shikoni me kujdes”, tha Shala duke shtuar se deri më tani Qeveria nuk ka publikuar asnjë lloj dokumenti relevant në lidhje me koston e paguar ndaj Bechtelit, dhe vendimin e qeverisë Haradinajt për ta paguar 53 milionëshin si vendim arbitrar.

NISMA kërkon auditor

Shefi i Grupit Parlamentar te NISMA-s, Bilall Sherifi ka propozuar që të angazhohet një auditor i jashtëm në mënyrë që të saktësohet e vërteta për 53 milionë eurot që ju dhanë kompanisë “Bechtel Enka”.

Në emër të Grupit Parlamentar të Nismës Socialdemokrate ka propozuar që të angazhohet një auditor i jashtëm në mënyre që të dal në pah e vërteta.

“Propozojë një auditor të jashtëm, që na tregon si u shkaktua ajo dhe kush e shkaktoi.Le ta bëjmë një letër të përbashkët të Auditorit. …Kur auditimi vjen me një raport se kjo është e vërteta, atëherë ne votojmë në Kuvend dhe shohim kush janë përgjegjësit. Le të përfundon kjo plojë  si macja e miu”, tha ai duke sqaruar se kjo shumë është 10% e shumës së kontratës totale.

Interpelanca në mëshirën e Veselit

Deputetët e Kuvendit të Kosovës për 7 orë kanë diskutuar për 53 milionë eurot të cilat Qeveria e Kosovës do t’ia paguajë kompanisë “Bechtel Enka”.

Pas këtij debati nuk pati ndonjë rezultat edhe pse deputetët kanë krijuar një grup për harmonizimin e pikave për një Rezolutë për ta dërguar pastaj të njëjtën në votim.

Deputetët u pajtuan që seanca për të enjten të ndërpritet, por nuk janë marr vesh se kur do të vazhdojë.

Edhe pse u  hodh në votim se kur do të vazhdojë, seanca nuk u caktua pasi që  nuk kishte kuorum.

Kujtim Shala që kryesonte seancën  tha se se kjo mbetet në dorë të kryetarit të Kuvendit, Kadri Veseli të vendosë për vazhdimin e saj.

Interpelanca e sotme është thirrur nga LDK-ja në të cilën është diskutuar për 53-milionëshin e kompanisë “Bechtel-Enka”.

Deputetët e pozitës dhe të opozitës kanë akuzuar njëri-tjetrin për mungesë të përgjegjësisë. Përderisa, opozita ka kërkuar publikimin e nënshkrimit të kontratës me “Bechtel-Enka”-n.