Haradinaj: Mali i Zi është partner i Kosovës në planin ndërkombëtar

Kryeministri i Kosovës, Ramush Haradinaj tha se Qeveria e Kosovës e sheh me interes madhor fuqizimin e bashkëpunimit me Qeverinë e Podgoricës, veçmas në ekonomi, si mundësi reale për ngritjen e mirëqenies së shqiptarëve në Mal të Zi.

“Mali i Zi është partner i Kosovës në planin ndërkombëtar, fuqizimin e stabilitetit rajonal si dhe në rrugën e përbashkët europiane. Qeveria e Kosovës sheh me interes madhor fuqizimin e bashkëpunimit me Qeverinë e Podgoricës, veçmas në ekonomi, si mundësi reale për ngritjen e mirëqenies së shqiptarëve në Mal të Zi,” tha Haradinaj pas takimit me përfaqësuesit e subjekteve politike shqiptare në Mal të Zi duke shtuar:

“Shqiptarët, sot, janë në pozitë të volitshme kudo që jetojnë dhe si faktorë rajonal ata po marrin përgjegjësitë e tyre, në krijimin e paqes së përhershme në Ballkanin Perëndimor,” tha kryeministri i Kosovës, Ramush Haradinaj i cili pas këtij takimi në Mal të Zi theksoi se bisedimet do të vazhdojnë së shpejti edhe në Prishtinë.