Haradinaj në Hagë, Ambasadori i Edi Ramës në Parlamentin e Serbisë
Pak çaste para se të jap lajmin për dorëheqjen e Kryeministrit të Kosovës, Ramush Haradinaj, Televizioni publik i Serbisë, RTS, bëri të ditur se Ambasadori i Shqipërisë në Beograd, Ilir Boçka, është ftuar në parlamentin e Serbisë.
Grupi parlamentar i Miqësisë me Shqipërinë që numëron 25 deputetë, e ku bëjnë pjesë edhe antishqiptarët më të devotshëm në Serbi si Milovan Drecun (SNS), Aleksandar Çotriç (SPO), Gordana Çomiç (DS), Dubravska Filipovski (SNS), Tomisllav Zhigmanov (DSHV) e Dejan Radenkoviç (SPS), javën e ardhshme do të zhvillojnë një takim me Ambasadorin e Edi Ramës, diplomatin e dështuar në integrimet euro-atlantike, Ilir Boçka.
Çotriç, tha për Agjencinë serbe të lajmeve “Tanjug” se deputetët në këtë takim do të prezantojnë qëllimet për të cilat do të angazhohen, duke kontribuar në ndërtimin e marrëdhënieve më të mira në mes të dy vendeve.
“Dëshirojmë të bisedojmë për për bashkëpunimin e parlamenteve, edhe pse sot tek ata është një krizë e madhe politike. Opozita po zhvillon protesta, kërkojnë zgjedhje të jashtëzakonshme parlamentare, kështu që ka mbetur të konfirmohet se a ekziston grupi i miqësisë me Serbinë në Parlamentin e Shqipërisë, me të cilin do të vendosim kontakte,” tha Çotriç dukshëm i painformuar për Parlamentin e Shqipërisë, ndonëse e kuptueshme meqë vjen nga një parti antikomuniste siç është SPO, dhe nuk është në dijeni se aty ku sot ka një mazhorancë është krijuar nga Beogradi që në vitin 1944.
Ndryshe, Aleksandar Çotriç bëri të ditur, thekson RTS, se në vjeshtë është planifikuar një vizitë në Shqipëri ku do të zhvillojnë takime me Kryetarin e Parlamentit dhe Kryeministrin, e ku do të diskutohen çështjet e hapura, e njëra ndër to, tha ai, është pozita e pakicës serbe në Shqipëri, që Çotriç mendon se nuk është zgjidhur mirë, dhe si ekstremist serbe që është, e konsideron si pakicën më të kërcënuar në Evropë sot.
“Gati të gjitha të drejtat u janë mohuar, e drejta në gjuhën amëtare, arsim dhe informim,” tha Aleksandar Çotriç.
