Haradinaj: Një Konferencë për Kosovën, Zv/Kryeministri Hoti: S’ka nevojë!
Kryetari i Aleancës për Ardhmërinë e Kosovës, Ramush Haradinaj, ka propozuar sot që të mbahet një Konferencë për Kosovën në Prishtinë, ku do të merrnin pjesë prijësit e partive politike dhe përfaqësuesit e SHBA dhe BE-së propozim i cili menjëherë është hedhur poshtë nga Zv/Kryeministri i Kosovës, Avdullah Hoti.
“Si Aleancë, ne kërkojmë që me u marr vesh se kah dojmë me ia mbajtë. Propozoj që të thirret një konferencë për Kosovën që të mbahet në Kosovë, e përbërë nga kryetarët e partive politike, por edhe udhëheqësit e dialogut, SHBA pra, dhe lehtësuesit, pra BE. Kjo konferencë e Kosovës në Kosovë, do të mundte me kriju një qëndrim unik, që do t’ua lehtësonte SHBA-se dhe BE-së që të pajtohemi për dialogun,” tha Haradinaj duke vlerësuar se procesi i marrëveshjes me Serbinë tashmë është kompremetuar.
“Procesi i marrëveshjes me Serbinë është komprementu. Faktori politik në vend është përçarë, presidenti në njërën anë, kryeministri në tjetrën. Pikërisht për këtë arsye Kosova është bërë subjekt i bisedimeve dhe jo palë në tavolinë,” tha Kryetari i AAK duke konstatuar se tashmë në Kosovë ekzistojnë dy blloqe politike, ai i Presidentit dhe ai i Kryeministrit, por asnjëri nuk po i bën mirë Kosovës ndërsa përfundon:
“Blloku politik që kërkon heqjen e taksës, e vendosë përpara kohën përpara kualitetit të marrëveshjes. Këtë bllok opozitar e udhëheqë njeriu që kërkonte shkëmbime territoriale, pra presidenti Thaçi. Blloku tjetër i udhëhequr nga Kurti e kryetarja e Kuvendit Vjosa Osmani, nuk ka kalkuluar mirë, sepse kërkon heqjen e taksës po ashtu, por pa dakordim me SHBA-në.”.
Por Zv/kryeministri i Parë, Avdullah Hoti, duke kundërshtuar idenë e Ramush Haradinajt thekson se institucionet që kanë dalë nga zgjedhjet e fundit bartin legjitimitetin për të marrë përgjegjësitë bazuar në ligje e kushtetutë edhe sa përket dialogut me Serbinë.
“Kosova ka institucione legjitime te dalura nga zgjedhjet demokratike te 6 tetorit, te cilat bartin pergjegjesite kushtetuese, perfshire edhe dialogun me vendin fqinj Serbine. Nuk ka nevoje per asnje konference per kete qellim, te brendeshme as te jashtme,” thekson Avdullah Hoti në reagimin e tij përmes rrjetit social Facebook duke përfunduar:
“Duhet vetem ushtrim i pergjegjesive kushtetuese nga secili. Kryeministri duhet te marre persiper dialogun ashtu sic e definon edhe aktgjykimi i Gjykates Kushtetuese. Presidentin duhet te qendroje brenda kompetencave te veta kushtetuese.”
