Haradinaj nuk e dorëzon mandatin me ceremoni por me telefon

Kryeministri i Kosovës në largim, Ramush Haradinaj, nuk do t’ia dorëzojë mandatin me ceremoni zyrtare Albin Kurtit. Këtë tha se mbase do ta bëjë me telefon, ose ndonjë zëvendës i tij do t’ia dorëzojë mandatin liderit të Vetëvendosjes.

‘Unë do të jem jashtë vendit, ose do ta lus dikë nga zëvendëskryeministrat me bë dorëzimin e detyrës menjëherë pas zgjedhjes së kryetarit të Qeverisë ose do t’i bëjë një telefonatë me i uru sukses,” tha Haradinaj ndërsa saktësoi se nesër nuk do ta votojë qeverinë e re.

Ramush Haradinaj mban postin e kryeministrit në largim nga dorëheqja e 19 korrikut të vitit të kaluar.

Nesër, pritet të mbahet seanca e Parlamentit të Kosovës, ku do të votohet Qeveria e re.

Sipas marrëveshjes së koalicionit të nënshkruar sot nga LVV dhe LDK, Qeveria e re e Kosovës do të ketë 15 ministri, dy Zv/kryeministra dhe 33 Zv/ministra. Ndërkaq, kryetari i Parlamentit të Kosovës, do t’i takojë Lidhjes Demokratike të Kosovës.