Haradinaj: Nuk shfuqizohet taksa ndaj importeve serbe pa njohje reciproke
Kryeministri i Kosovës, Ramush Haradinaj ka ripërsëritur se nuk do të shfuqizohet taksa 100 për qind për produktet e importuara nga Serbia dhe Bosnja pa nënshkrimin e një marrëveshjeje përfundimtare me Serbinë që do të rezultojë me njohjen e ndërsjellë, raporton RFE.
Në një konferencë për media pas mbledhjes së Qeverisë, Haradinaj tha se taksa mund të zgjasë deri në një marrëveshje për njohje apo edhe deri në vitin 2022, deri kur, sipas tij, Serbia, po përpiqet të zvarrisë negociatat.
“Nëse shkruhet një kontratë për një marrëveshje gjithëpërfshirëse dhe duhet të shkojmë aty për të vendosur firmën e jepi mundësinë që të pezullojmë për aq ditë sa zgjatë ajo mundësia për t’u nënshkruar. Nuk është qëllimi që me taksë të bllokojmë nënshkrimin e marrëveshjes për njohje. Serbia mendon të shkojë deri në vitin 2022 për aplikim në Bashkimin Evropian dhe ne do ta mbajmë taksën deri në 2022 nëse nuk ka marrëveshje për njohje taksa rrin,” tha Haradinaj.
Deklaratat e kryeministrit të Kosovës për taksën vijjnë pas presionit të shtuar nga Shtetet e Bashkuara dhe Bashkimi Evropian për pezullimin e saj. Madje këto kërkesa për pezullim të kësaj mase nga SHBA-ja dhe BE-ja, Haradinaj i ka pranuar edhe vetë në këtë konferencë para gazetarëve.
Ndërkohë Zëdhënësja e Qeverisë së Kosovës, Donjeta Gashi ka deklaruar për RFE se zyra e kryeministrit nuk ka pranuar përgjigje zyrtare nga Ambasada e Shteteve të Bashkuara në lidhje me kërkesën për pajisje me vizë nga ana e kryeministit, Ramush Haradinaj.
“E vetmja arsye e udhëtimit të kryeministrit në SHBA, do të ishte pjesëmarrja në organizimin e Lutjes së Mëngjesit,” tha Gashi.
Ndryshe, stacioni televiziv “Al Jazeera Balkans” ka raportuar se duke u bazuar në burime nga Departamenti amerikan i Shtetit, kryeministrit të Kosovës, Ramush Haradinaj, i është refuzuar viza amerikane për shkak të tarifës ndaj mallrave të Serbisë dhe Bosnje e Hercegovinës dhe se ai nuk do të mund të marrë pjesë në një konferencë për Ballkanin në fillim të shkurtit. Mospjesëmarrjen në këtë konferencë, e ka konfirmuar për këtë stacion televiziv edhe njëri nga organizatorët.
