Haradinaj: S’ka dert nëse prishem me SHBA, taksa mbetet

Kryeministri i Kosovës Ramush Haradinaj, tha se vendimi për taksën ndaj produkteve të Serbisë dhe Bosnjës është legjitim dhe se ajo nuk do të hiqet në një të ardhme të afërt.

“Ai vendim është legjitim dhe për çfarëdo çmimi e varianti”, tha Haradinaj sot taksa ndaj Serbisë dhe Bonjës mbetet deri në qershor, raporton RTK.

Sipas tij qëndrimet e tij i ka shprehur edhe dje përmes letrës dërguar BE-së.

“Unë jam në vazhdimësi në ato vendime”, tha ai.  Haradinaj bëri me dije se deri më tani ka marrë përgjigje nga QUINT-i pas letrës dërguar dje.

Kryeministri Ramush Haradinaj, i pyetur nëse qëndrimi i tij i shprehur në letrën dërguar shteteve anëtare të QUINT-it, po i prish raportet me ndërkombëtarët, ai tha se nëse nuk pranohen kushtet e vëna nga ai, atëherë nuk e ka dert nëse prishet me këdo.

Pasi Ambasada amerikane i kërkoi që ta pezullojë menjëherë taksën, Haradinaj i ka shkruar SHBA-së dhe vendeve të tjera të QUINT-it, ndërsa thotë se nuk i intereson nëse dikë e pengojnë kushtet që ai ka vënë në këto letra, në mënyrë që të hiqet taksa.

“Nëse njëra nga kushtet që e kam nxjerrë unë më prish me dikë, nuk ka dert. Du me nejt mirë me të drejtën tem. Nëse dikush ka problem me ato kërkesa, atëherë jemi të prishtë. Nëse mujnë pa marrëveshje, mujmë edhe na. 2020-ta po vjen, Serbia ka me hy në BE. Nuk e di pse ne duhet me dhënë nga vetja në këto rrethana. Kushdo që ka problem, si i brendshëm si i jashtëm me këto kërkesa, del kundër të drejtës tonë. Ne nuk kemi mirëkuptim me dikë që ka probleme me këto kërkesa. I bjen tërheqje e njohjes. Unë nuk besoj që SHBA-ja ka probleme me këto kushte, por kushdo që ka, atëherë dihet në çfarë marrëdhëniesh futemi,” tha Haradinaj pas mbledhjes së Qeverisë së Kosovës.