Haradinaj: Vlerat më të larta atdhetare i gjejmë te Isa Boletini
Kryeministri Ramush Haradinaj duke përkujtuar 103 vjetorin e vrasjes së Isa Boletinit tha se figura e Boletinit edhe tani duhet të jetë shembull se interesi kombëtar vendoset para çdo interesi tjetër.
Isa Boletini e identifikoi veten me fatin e atdheut:
“Unë jam mirë, kur është mirë Shqipëria!”
Edhe sot duhet të na udhëheqë në kërkimin për të drejtën tonë.
“Nëse në historinë tonë kombëtare kërkojmë vlerat më të larta atdhetare, ato i gjejmë në figurën e Isa Boletinit. Me vet veprimtarinë e tij jetësore na la një porosi, se atdheu nuk tjetërsohet dhe nuk vihet në pazar. Roje dhe dëshmi është vet prehja e tij në Boletin. Figura e Isës edhe tani le të jetë shembull për të gjithë se interesi kombëtar e shtetëror vendoset para çdo interesi tjetër. Lavdi e përjetshme,” thekson Haradinaj.
Ndërsa Presidenti Hashim Thaçi, duke theksuar se përpjekjet e Isa Boletinit një shekull më parë për çlirimin e trojeve etnike përbëjnë ende frymëzim për brezat e rinj shtoi se bashkimi kombëtar dhe fuqizimi i kombit tonë ishte porosia që na e la Isa Boletini.
“U bënë 103 vjet nga vrasja e Isa Boletinit, njërit prej udhëheqësve kryesorë të kryengritjeve shqiptare. Bashkimi kombëtar dhe fuqizimi i kombit tonë ishte porosia që na e la Isa Boletini. Përpjekjet e tij një shekull më parë për çlirimin e trojeve etnike përbëjnë ende frymëzim për shumë breza të rinj dhe amaneti i Isa Boletinit dhe patriotëve të tjerë, që dhanë jetën për bashkimin e shqiptarëve, na obligon edhe sot që të punojmë pareshtur për përmbushjen e aspiratave tona,” thekson Thaçi përmes rrjetit social Facebook.
